Ақтауда жыл басынан бері екінші үшем дүниеге келді
Ақтауда жыл басынан бері 4319 нәресте өмірге келген
Маңғыстау облыстық перинаталдық орталығында Айым, Гүлім және Нұрым есімді үшем дүниеге келді, деп хабарлайды Azattyq Ruhy lada.kz-ке сілтеме жасап.
Үшемдер 27 маусым күні облыстық перинаталдық орталықта дүниеге келген.
«Үшем болатынын білгенде бір жағынан қуандық, бір жағынан таң қалдық. Күйеуімнің жағында егіздер бар. Дәрігерлердің кеңесімен кесір тілігі арқылы босануды жоспарладық. Барлығы сәтті шықты. Медицина қызметкерлеріне үлкен рахмет айтамын, - деді үшемнің анасы Амангүл Тасыбекова.
Сәбилер білікті медицина мамандарының қарауында болды. Нәрестелердің жағдайы тұрақталғаннан кейін, үйге шығарылған.
«Жүктіліктің 33-аптасында босанды. Қыздардың салмағы 2 келі 286 гр және 1 келі 880 гр, ал ұл баланың салмағы 2 келі 250 гр. Нәрестелер мен анасының жағдайы жақсы», - деді облыстық перинаталдық орталықтың бөлім меңгерушісі Гулзада Сарбалаева.
Ақтауда жыл басынан бері облыстық перзентханада 4319 нәресте өмірге келген, олардың 85-і егіздер, екеуі үшемдер.
