«Талқыламауды сұраймыз»: Қазақстан шахмат федерациясы Асаубаеваның мәлімдемесі туралы

Қазақстан шахмат федерациясы әлем чемпионы Бибісара Асаубаевның мәлімдемесіне қатысты пікір білдірді, деп хабарлайды Azattyq Ruhy.

ҚШФ баспасөз қызметі федерация жұмысы үшін мемлекеттен ешқандай қаржы сұралмағанын мәлімдеді. Мемлекет басшысымен және әкімшілікпен кездесу кезінде ҚР шахмат тұжырымдамасы қарастырылған.

«Бұған қатысты бірнеше мәрте ақпарат жарияланды. Оған дәлел ретінде, Қазақстанның Мәдениет және спорт министрі Дәурен Абаев, ҚШФ президенті Ғалым Хусаинов, вице-президент Дәрмен Сәдуақасов, Жансая Әбдімәлік мәлімдеме жасады. Ақорданың баспасөз қызметі хабарлағандай, Қасым-Жомарт Кемелұлы федерация ұсынған Қазақстандағы шахматты дамыту бастамасын қолдады. Мектеп қабырғасындағы шахмат, муниципалды клубтар, оқытушыларды даярлау жұмыстарын ҚШФ қаржыландыра алмайды. Мұнымен арнайы министрліктер айналысады», - делінген федерацияның әлеуметтік желідегі ресми мәлімдемесінде.

Аталған ұйым алдағы уақытта бұл тақырыпты талқыламауды сұрады.

«Қазіргі уақытта спортшылар мен Федерацияның басты назары Үндістандағы олимпиадаға дайындалуға бағытталған. Біз бұқаралық ақпарат құралдарынан бұл тақырыпты енді талқыламауды және одан да маңызды істерге назар аударуға мүмкіндік беруді сұраймыз», - делінген шахмат федерациясының мәлімдемесінде.

Тақырыпқа орай: «Айтқанымды дәлелдеуге дайынмын»: Бибісара Асаубаева шахмат федерациясындағы жанжал туралы

Еске салсақ, Бибісара Асаубаева Федерацияның шахматшыларды Президент Әкімшілігі жетекшісінің орынбасары Аида Балаевамен кездесуге шақырып, одан үш миллиард теңге «сұрап беруді» өтінгенін айтып, сынға алған болатын.

Алайда Қазақстан шахмат федерациясы президентінің орынбасары Дәрмен Сәдуақасов Бибісара Асаубаеваның жанжалды мәлімдемесін жоққа шығарып, федерация «ештеңе сұраған жоқ» деп мәлімдеді. Осы мәселеге орай Мәдениет және спорт министрі Дәурен Абаев та пікір білдіріп, ешкімнің еш жерден ақша сұрамағанын айтты.

Қазақстандық шахматшы Жансая Әбдімәлік те әріптесі Бибісара Асаубаеваның резонансты мәлімдемесі жайлы «Бибісара Өзбекстанның шахмат федерациясы бөліп отырған үш миллион долларды үш миллиард теңгемен шатастырып отыруы мүмкін» деген еді.

Алайда Б. Асаубаева ақыл-ойы бүтін, есте сақтау қабілеті жақсы ересек спортшы екенін және ештеңені шатастырып немесе ойдан шығармағанын айтып, федарция басшыларын арнайы детектордан өтуге шақырған болатын.