Қазақстанның көмір тиелген ресейлік вагондарды кешіктіріп жатқаны туралы хабарлама – жалған

Индустрия және инфрақұрылымдық даму министрлігінің Көлік комитеті Қазақстан тарапының көмір тиелген ресейлік вагондарды кешіктіріп жатқаны туралы хабарламаның шындыққа жанаспайтынын ресми түрде мәлімдеді, деп хабарлайды Azattyq Ruhy.

ТМД медиа-кеңістігінде Қазақстан өз аумағында көмір тиелген ресейлік 1700 теміржол вагонының қозғалысын бұғаттап тастаған деген жалған ақпарат тарап жатыр. Осыған байланысты Қазақстан Республикасы Индустрия және инфрақұрылымдық даму министрлігінің Көлік комитеті ресми түрде бұл хабарламалардың шындыққа жанаспайтынын, яғни жалған екенін мәлімдеді.

«Шын мәнінде, Қазақстан аумағында көмір тиелген 1700 бірлік көлеміндегі ресейлік вагондар жоқ. РТЖ жолдарында да Қазақстанға бағытталған, я болмаса Қазақстаннан шыққан көмірі бар вагондар тіркелмеген.

Ресей теміржолдарымен штаттық режимде жұмыс істеп жатырмыз, экспорт пен импорт бойынша ешқандай кідіріс жоқ», – деді ҚР ИИДМ Көлік комитеті теміржол инфрақұрылымы және жүк тасымалы басқармасының басшысы Сәтжан Өзбеков.

Қазақстан Республикасы Индустрия және инфрақұрылымдық даму министрлігі ресейлік транзиттік вагондардың кешігуі туралы жалған ақпаратты – екі ел арасындағы тату көршілік қатынастарды әлсіретіп, беделін түсіруге бағытталған қасақана жасалған іс-әрекет ретінде қарастырады.

Сондай-ақ ҚР ИИДМ жалған ақпарат таратқаны үшін Қазақстан және Ресей заңнамасында да жауапкершілік көзделгенін еске салады. Жағымсыз жағдайларды болдырмас үшін бұқаралық ақпарат құралдарына осындай мазмұндағы кез-келген хабарламаны бірнеше рет тексеру ұсынылады.