Ұлттық құрылтай қазақстандық қоғамның демократиялық қағидалармен өмір сүре бастағанын аңғартады – Исламбек Салжанов

Бүгін Ұлытауда Ұлттық құрылтай өтті. Құрылтайға қатысқан кәсіпкер, меценат Исламбек Салжанов ел тарихындағы маңызды оқиға жайлы ойымен бөлісті.

«Осындай мемлекеттік деңгейдегі аса маңызды саяси шараның Сарыарқаның төрінде – қазақтың хан-сұлтандарының ізі қалған сайын даланың төсінде өткізілуінің мәні тереңде жатыр.

Ерте заманнан құрылтай ел тағдыры шешілетін аса маңызды оқиғалар алдында шақырылған. Ұлттық құрылтай жаңа Қазақстанды құруға тұтас елді жұмылдыру үшін құрылды.

Бұл Құрылтай – Әділетті Қазақстанды құруға қажетті батыл да жасампаз идеяларды ұсынатын орта болса, Ұлытау –  Президент айтпақшы, Жаңа Қазақстанды құру жолындағы бірліктің символына айналды.

Меніңше, Ұлттық құрылтайдың өзі қазақстандық қоғамның демократиялық қағидалармен өмір сүре бастағанын аңғартады. Президент оның электронды нұсқасын жасауды тапсырды. Енді Qurultay деген арнайы мобильді қосымша арқылы кез келген адам Әділетті Қазақстанды құру жолдары туралы өз ұсынысын жеткізе алады. Бұл – Жаңа Қазақстанда әрбір азаматтың ой-пікірі маңызды деген сөз.

Әулиетаудың етегінде Мемлекеттік рәміздер алаңын ашу туралы ұсынысы – Көк туымыздың қадірін қашырған оқиға туралы қоғамдағы соңғы талқылауларға жауап.

25 қазан – Республика күніне ұлттық мереке мәртебесін қайтарып, Егемендік күні деп белгілеу туралы шешім – көзі қарақты азаматтар көптен бері айтып жүрген мәселе.

Бұдан бөлек, ұлттық тарихтың көптомдығын әзірлеу, зияткерлік қабілеті жоғары, ойы ұшқыр, еңбекқор жастар тәрбиесін жолға қою, Тіл білімі институтына қазақ тілінің жаңа орфографиясы туралы арнайы еңбек әзірлеуді тапсыру – қоғамдық сұраныстан туындаған шешімдер.

Ал «Қазақ мемлекеті аман тұрғанда, қазақ тілі жасай береді. Бұған ешқандай күмән болмауы керек» деген сөзі – қоғамдағы ең үлкен түйткілдердің біріне тойтарыс беруі.

Шетелге заңсыз шығарылған қаржыны елге қайтарумен айналысатын арнаулы мекемеаралық комиссия құру туралы шешім – әділ қоғамдағы баршаға тең қарау қағидасымен үйлеседі.

Ендеше, осы Құрылтайдан көптің көкейіндегі көп түйткілге жауап алдық деп ойлаймын», - деп жазды Исламбек Салжанов.