Таразда көшеде қауіпті дрифт жасаған көлік жүргізушісі ұсталды

Тараз қаласында жол ережесін өрескел бұзған BMW жүргізушісі ұсталды. 28 жастағы ер адам мемлекеттік тіркеу нөмірін шешіп тастап, көшеде қауіпті дрифт жасаған, деп хабарлайды Azattyq Rýhy Sputnik Қазақстанға сілтеме жасап.

Тараз полицейлері тәртіп бұзушылықты әлеуметтік желіге мониторинг жүргізу кезінде анықтады. BMW жүргізушісі көше қиылыстарында тоқтап, бірнеше рет қауіпті дрифт жасаған. Басқа көліктерге кедергі келтірген. Көлік иесі мемлекеттік тіркеу нөмірін шешіп тастапты.

Алайда патрульдік полиция батальонының қызметкерлері көшеде шыр айналған көліктің иесін тапты. Ол Тараз қаласының 28 жастағы тұрғыны болып шықты. Әкімшілік құқық бұзушылық туралы кодекстің 630-бабының 1-бөлігі (жол жабындысын ластау) бойынша үш хаттама және 590-баптың 2-бөлігі (мемлекеттік тіркеу нөмірін тақпау) бойынша тағы бір хаттама толтырылды. Осылайша BMW иесіне барлығы 49 000 теңге көлемінде айыппұл салынды.

Автокөлік арнайы автотұраққа қойылып, көлік иесімен профилактикалық жұмыс жүргізілді.