Парижде Мұстафа Шоқайдың мақалалары кітап болып, басылып шықты

Парижде Мұстафа Шоқайдың француз тілінде жазған мақалалары бір кітап болып, басылып шықты, деп хабарлайды «Хабар 24».

Бұл Түркияда тұратын қазақ, тарихшы Әбдіуақап Қараның көп жылдық зерттеулерінің нәтижесі. 20 жылдай эмиграцияда жүрген Мұстафа Шоқай жүздеген мақала жазды. Оның 120-сы француз тілінде. Францияның ақпарат құралдарында жарияланған туындыларының осы бөлігі жаңа жинаққа енді. Олардың барлығы Кеңес Одағында түркі халықтарының хал-жағдайына арналған. Жалпы Түркістан автономиясы басшысының өмірі мен еңбегі әлі күнге дейін толық зерттелмеген. Болашақта батыс басылымдарында жарияланған Мұстафа Шоқайдың мақалаларын қаза тіліне аудару жоспарда бар.

«Бұл кітап сол зерттеушілерге оңай болсын және біз мысалы Шоқайды қалай танимыз? Оны пікірлері арқылы танимыз. Сондықтан оның өзінің таза ойын таза оның қаламынан көру керек. Сондықтан бұл француз тіліндегі мақалалары оның өзінің мақалалары, біз оны аударған жоқпыз. Сол оригинал күйінде бердік. Енді оны ғалымдар, француз тілін білгендер түсінеді. Екіншіден біз оны шығарудың бір себебі – Еуропа танысын деп, өйткені өзіміздің ұлыларымызды өзімізге ғана айтып қоймауымыз керек, әлемге таныстыруымыз керек. Осы орайға бұл қызмет істейді, бірақ екіншіден оның пікірлепрін өзіміз де білуіміз керек», - дейді Мимар Синан атындағы университеттің профессоры Әбдіуақап Қара.