Мәжіліс депутаты Алматыда ұстаздар қауымымен кездесті

Azattyq Rýhy

Депутат жастармен де кездесу өткізді

Мәжіліс депутаты Алматыда ұстаздар қауымымен кездесті

Мәжіліс депутаты Елнұр Бейсенбаев референдумды халыққа түсіндіру мақсатында Алматы қаласындағы ұстаздар қауымымен және жастармен кездесті. Бұл туралы Azattyq Rýhy Мәжілістің баспасөз қызметіне сілтеме жасап хабарлайды.

Іс-шарада педагогтармен Ата Заңдағы жер және жер қойнауы, су, өсімдіктер мен жануарлар дүниесі, басқа да табиғи ресурстар халыққа тиесілі екені туралы нормалар талқыланды.

«Педагогтардың мәртебесін көтеру бойынша соңғы 3 жылда жасалған реформалардың нәтижесінде жалақының едәуір көтерілгенін мұғалімдер нақты сезінді. Сондықтан қазіргі саяси реформалардың оңтайлы өзгерістерге бастау болатын тізбегіне ең жоғарғы сенім артып отырғандар да біздің ұстаздарымыз, – деді Елнұр Бейсенбаев.

Депутаттың айтуынша конституциялық реформа азаматтардың елді басқару ісіне қатысу мүмкіндігін арттырып, алдағы уақытта әлеуметтік әділеттіліктің орнауына түрткі болатынына ұстаздар қауымы қолдау білдіріп отыр.

Сонымен қатар депутат бұл саяси өзгерістер ең алдымен жастар санаты үшін маңызды екенін ескере отырып, белсенді жастармен жүздесіп, реформаның мән-жайын түсіндірді.

Қазақстанда 11,8 млн-нан астам адам сайлауда дауыс беру құқығына ие, ал олардың 5,2 млн-ы – (43%) 35 жасқа дейінгі жастар. Яғни іс жүзінде әрбір екінші дауыс беруші адам жастардың өкілі.

«Осыған байланысты, еліміздің әрбір жас адамы Конституцияға енгізілетін түзетулер Тәуелсіз Қазақстан тарихында жаңа тарауды ашатынын түсінуі тиіс», – деді депутат Елнұр Бейсенбаев.

×
Бұл желілік ресурстың ақпараттық өнімдері 18 жастан асқан адамдарға арналған.