Бұл – нағыз қаһармандық пен қайсарлықтың мерекесі – Мәулен Әшімбаев

Azattyq Rýhy

Ол батырлардың есімі мен ерлігін ұлықтау кейінгі ұрпақтың борышы екенін еске салды

Парламент Сенатының төрағасы Мәулен Әшімбаев Бауыржан Момышұлының ескерткішіне гүл шоқтарын қойды, деп хабарлайды Azattyq Rýhy.

«Құрметті достар! Баршаңызды Жеңіс күнімен құттықтаймын.

Бұл – нағыз қаһармандық пен қайсарлықтың мерекесі. Бүгін осы атаулы датаға орай Президентіміз Қасым-Жомарт Кемелұлы Тоқаевпен бірге «Отан Ана» монументіне гүл шоқтарын қойып, бабалар рухына тағзым еттік.

Жеңіс күніне орай ұлтымыздың даңқты перзенті Бауыржан Момышұлының ескерткішіне де арнайы бардым. Бәукең – қазақ үшін ерлік пен өрліктің символы. Аты аңызға айналған батырдың тұлғасын біз қашанда ардақ тұтамыз», - деді Сенат спикері.

Ол сөзін жалғай отырып, батырлардың есімі мен ерлігін ұлықтау кейінгі ұрпақтың борышы екенін еске салды.

«Еңселі елдік – ерен ерліктің нәтижесі. Сондықтан аталарымыз бен әкелеріміздің даңқты жолын әрдайым ұлықтау – біздің перзенттік борышымыз. Сол себепті таяуда ғана Мемлекет басшысы ерлігі уақытында ескерілмеген батырлар Төлеуғали Әбдібековке, Александр Несмияновқа және Ыбырайым Сүлейменовке «Халық қаһарманы» атағын берді. Бұл – тарихи әділдікті қалпына келтірудің жарқын көрінісі.

Бейбітшілік пен береке-бірліктің қадірін арттыратын мерекемен құттықтай отырып, елімізге амандық, жерімізге тыныштық тілеймін! Әрдайым қастерлі Тәуелсіздігімізді бағалай білейік.

Жеңіс күні құтты болсын!» - деп жазды Мәулен Әшімбаев.

×
Бұл желілік ресурстың ақпараттық өнімдері 18 жастан асқан адамдарға арналған.