ШұғылҚазақстанда тағы 716 адамнан коронавирус анықталды

Азаматтық белсенділер кесірінен сот процесі кейінге қалды

Апелляциялық отырыс 24 қаңтарда өтеді

23 қаңтарда Алматы қалалық сотында азаматтық белсенділер Әлнұр Ильяшев, Марат Тұрымбетов пен Санавар Закированың Алматы қаласының Жетісу аудандық сотының шешіміне түсірген шағымы бойынша апелляциялық отырыс өтуі керек болған. Дегенмен, жауапкерлер мен оларды қолдаушы топ жоспарланған процеске кедергі келтірді, деп хабарлайды Azattyq Rýhy тілшісі.

Отырыс сот залында тек арыз беруші тарап пен жауапкерлердің қатысуымен өтуі тиіс еді. Ал қалғандарына процесті монитор арқылы бақылауға мүмкіндік беретін арнайы зал дайындалған. Дегенмен, белсенділер мен оларды қолдауға келгендер барлығына процесті арнайы залдан емес, сот залынан бақылауға мүмкіндік беруді талап етті. Сонымен қатар олар отырыстың кіші залда ұйымдастырылғанына ашық наразылық білдіріп, айғай-шу шығарды. Осылайша белсенділер басталған процеске кедергі келтірді.

Сот бүгінгі отырысты 24 қаңтарға ауыстыру туралы шешім қабылдады. Ал белсенділер қалалық сот ғимаратының алдына шығып, айғай-шуды жалғастырды.

Естеріңізге сала кетсек, қыркүйекте іскерлік беделін қорғаған «Nur Оtan» партиясы жалған ақпарат таратқан белсенділерді сотқа берген еді. Сотқа арыз беруге белсенділердің жаңа партия құруына «Nur Оtan» партиясының кедергі келтіргені туралы жазбасы әсер етті. Кейінірек «Nur Оtan» партиясының тағы төрт мүшесі белсенділерді сотқа берген болатын. 2019 жылдың 18 қарашасында Алматы қаласы Жетісу аудандық соты белсенділерді әлеуметтік желідегі парақшасында жалған ақпаратты жоққа шығаруға міндеттеді. Ал «Nur Otan» партиясы мүшелерінің арызы бойынша сот моральдық шығын ретінде олардың әрқайсысына 1,5 млн теңге төлеу туралы шешім шығарды.