Павлодарда қант бағасын ұстап тұру үшін 500 млн теңгеден астам қаражат бөлінді

Бұл туралы мәслихаттың экономика және бюджет мәселелері жөніндегі тұрақты комиссиясының отырысында белгілі болды, деп хабарлайды Pavlodarnews.kz.

Облыстың экономика және бюджеттік жоспарлау басқармасының басшысы Ирина Назарчуктың айтуынша, Балалар жылы аясында өңірде өткізілетін іс-шараларға – 1,6 миллиард теңге, оның ішінде мектеп оқушыларының тегін жол жүруіне – 424,3 миллион теңге, тамақтану құнын арттыруға – 381,4 миллион теңге, балалар үйін күрделі жөндеуге – 296,2 миллион теңге, мемлекеттік спорттық іс-шараларды арттыру бойынша 20 мың балаға шығармашылық тапсырыс үшін 486 миллион теңге, сондай-ақ сирек кездесетін орфандық ауруы бар балаға дәрі-дәрмек сатып алуға 50,2 миллион теңге қарастырылған.

«Тұрғын үйді дамытуға қосымша 1,4 миллиард теңге, оның ішінде Павлодардағы бес тұрғын үй құрылысына – 1,3 миллиард теңге, Ақсудағы тұрғын үй құрылысының аяқталуына 80,2 миллион теңге көзделген. Нәтижесінде ауданы 42,8 мың шаршы метр болатын 687 пәтер пайдалануға беріледі. Сондай-ақ қант бағасын ұстап тұру мақсатында «Павлодар «ӘКК» АҚ тұрақтандыру қорына сатып алуға 500,8 миллион теңге бөлінді», - деді Ирина Назарчук.

Облыс бюджетін нақтылау жобасында республикалық бюджетке пайдаланылмаған нысаналы трансферттерді қайтаруға байланысты 2021 жылғы жалғасатын бюджеттік инвестициялық жобаларды қаржыландыру және облысты басқару схемасын 4,3 миллиард теңгеге өзгертумен  өңірлік қазынаны түзетулер ескерілген.

Естеріңізге сала кетейік, қордағы қант жарты жылға жетеді, қажет болған жағдайда қосымша сатып алынады. Бағаны анықтау жөніндегі комиссия өнімнің құнын қайта қарауы мүмкін, себебі қантқа сұраныс артқан және «Павлодар» ӘКК АҚ үлкен шығындарға ұшырауда.