Қазақстанда Семей ядролық қауіпсіздік аймағы құрылады

Azattyq Rýhy

ҚР Парламенті Мәжілісінде Семей ядролық қауіпсіздік аймағы туралы заң жобалары талқыланды

 

 

Қазақстанда Семей ядролық қауіпсіздік аймағы құрылады
Фото: baq.kz

ҚР Қауіпсіздік Кеңесі мен Үкіметі басшылығының тапсырмаларына сәйкес «Семей ядролық қауіпсіздік аймағы туралы» және «Қазақстан Республикасының кейбір заңнамалық актілеріне Семей ядролық қауіпсіздік аймағы мәселелері бойынша өзгерістер мен толықтырулар енгізу туралы» заң жобалары әзірленді, деп хабарлайды Azattyq Rýhy.

Заң жобасына сәйкес бұрынғы Семей ядролық сынақ полигонында Семей ядролық қауіпсіздік аймағын құру жоспарланып отыр.

«Заң жобасын қабылдаудың негізгі мақсаты – радиациялық ластанған және таза жерлерді бөлу, ластанған учаскелерде радиациялық қауіпсіздікті қамтамасыз ету, аумақты оңалту және полигон жерлерін пайдалану мәселелерінде мемлекеттік бақылауды күшейту», - делінген Энергетика министрлігінің баспасөз қызметінің хабарламасында. 

Кешенді экологиялық тексеру және мемлекеттік экологиялық сараптама нәтижелері бойынша анықталған ластанған учаскелерде мамандандырылған аймақ құру жоспарланып отыр.

«Семей ядролық қауіпсіздік аймағы туралы» заң жобасында:

1) бұрынғы Семей сынақ полигоны жерлерінде және нормативтен тыс радиоактивті ластануға ұшыраған іргелес аумақтарда «Семей ядролық қауіпсіздік аймағы» арнайы аймағын құру;

2) радиоактивті ластанудың таралуын шектеу;

3) полигон аумағында тарихи пайда болған радиоактивті қалдықтарды жинау, орналастыру және кәдеге жарату арқылы Семей ядролық қауіпсіздік аймағының аумағын оңалту;

4) Семей ядролық қауіпсіздік аймағындағы радиоактивті ластану деңгейіне үздіксіз мониторинг жүргізу қарастырылады.

Заң жобаларының ережелерін іске асыру өңірдегі экологиялық жағдайды жақсартуға бағытталған.

Қарау қорытындысы бойынша заң жобасы мақұлданып, әрі қарай қарау үшін Парламент Мәжілісінің жұмыс тобына жолданды.

 

×
Бұл желілік ресурстың ақпараттық өнімдері 18 жастан асқан адамдарға арналған.