Отандық ғалымдардың ғылыми жоба экспорттаудан түскен табысы 346 млн теңгеден асты

Azattyq Rýhy

Барлық жоба ҚР БҒМ Ғылым қорының қолдауымен жүзеге асырылды

Фото: inform.kz

2021 жылы қазақстандық ғалымдардың ғылыми жобаларын экспорттаудан түскен табыс 346 млн теңгеден асты, деп хабарлайды Azattyq Rýhy Білім және ғылым министрлігінің баспасөз қызметіне сілтеме жасап.

Ғалымдар ғылыми жобаларды халықаралық нарыққа шығару арқылы қосымша табыс алады.

Жобалар Қытай, Ресей, Түркия, Грузия, Чехия, Қырғызстан сияқты елдерге экспортталады.

Мемлекеттік қолдаудың арқасында бүгінгі күні қазақстандық ғалымдар шетелдік ғалымдармен бірге медицина, нано және биотехнологиялар, жасанды интеллект, геология, минералды және көмірсутекті шикізатты өңдеу, ауыл шаруашылығы өнімдерінің қауіпсіздігі және экология саласындағы заманауи жобаларға қатысып жатыр.

Барлық жоба ҚР БҒМ Ғылым қорының қолдауымен жүзеге асырылды.

Ғылыми жобалардың арасында кобальт-57 радиоизотопы, жел және күн энергиясын өндіретін генераторлар, саңырауқұлақтарға қарсы препарат, медициналық, тағамдық және тұрғын үй-жайларды санитарлық тазартуға арналған биологиялық өнімдер, сүт сарысуы негізіндегі сусындар, пробиотиктер және т.б. бар.

«Соңғы 2 жылда 130-ға жуық жоба қаржыландырылды. Қор – ғылыми және ғылыми-техникалық қызмет нәтижелерін коммерцияландыру бойынша жобаларды гранттық қаржыландыру операторы. Бүгінгі күні біз ғылымды қажет ететін 120 өндірісті іске қостық, оның 15-і өнімін экспортқа шығарып үлгерді. Сонымен қатар 1,5 мыңға жуық жұмыс орны құрылды. Зияткерлік меншік авторлары мен ғылыми жобаларды пайдаланатын кәсіпорындар арасында 45 лицензиялық келісім жасалды», - деп атап өтті ҚР БҒМ Ғылым қоры басқармасының төрағасы Арын Орсариев.

Ғылым қорының қолдауымен «Антиген» ғылыми-өндірістік кәсіпорнының ғалымдары культуралдық вакцина өндіру технологиясын әзірледі. Бұл жоба үй және жабайы жануарлардың құтыру ауруының таралуын алдын алуға бағытталған. Бүгінгі күні вакцинаны Грузияға жеткізу ұйымдастырылды.

Микробиология және вирусология институтының ғалымдары сарысу негізіндегі тағамдық құндылығы жоғары отандық сусын шығаруды қолға алды. Сусынның бүйрек пен бауырдың жұмысына, сондай-ақ бүкіл ішектің жұмысына пайдасы зор. Сонымен бірге ревматизмдегі қабынуды азайтуға көмектеседі, гипертония кезінде қысымды қалыпқа келтіріп, атеросклероз қаупін азайтады.

 
×
Бұл желілік ресурстың ақпараттық өнімдері 18 жастан асқан адамдарға арналған.