«Қанша жылдан бері министр болып отырсыз, сұраққа дұрыс жауап бермедіңіз»: депутат Бақыт Сұлтановты сынға алды

Еділ Жаңбыршин министрдің жауабына көңілі толмағанын білдірді

 

«Қанша жылдан бері министр болып отырсыз, сұраққа дұрыс жауап бермедіңіз»: депутат Бақыт Сұлтановты сынға алды

Парламент Мәжілісінің отырысында депутат Еділ Жаңбыршин өңірлерде халық азық-түлік бағасының күн сайын қымбаттап жатқанын айтты, деп хабарлайды Azattyq Rýhy тілшісі.

«Барлық кездесуде халықтың көтерген мәселесі – азық-түлік бағасының өсуі. Өткен айдың бір аптасының ішінде кей өңірде азық-түлік бағасының өсу деңгейі 36 %-ды көрсетіп отыр. Сататистикалық дерек бойынша қазақстандықтар табысының жартыснан көбін азық-түлік алуға жұмсайды екен. Біздің азаматтардың еңбек ақысының өсу деңгейі әлеуметтік маңызы бар тамақтардың бағасының өсу деңгейіне ілесе алмай отыр. Бұған қоса, азық-түлік көлемінің жеткілікті болуы мәселесі де сұрақ тудырады. Осы ретте бағаны реттеуді қалай жоспарлап отырсыздар?» - деген сауал қойды Еділ Жаңбыршин.  

Сауда және интеграция министрі Бақыт Сұлтанов алдымен әлемдегі жағдайға тоқталып, бағаның қымбаттауы барлық елде болып отырған жағдай екенін атап өтті.

«Геосаяси жағдайға байланысты әлемде бағаның жаппай өсуі бізге де кері ықпал етіп отыр. Әлемде жыл сайын 20 пайызға азық түлік бағасы өсті. Еуропада да 5-7 пайызға дейін инфляция тіркеліп отыр. Көршілес елдерде де бағаның өсуі 15 пайызға жетіп отыр. Бұған қоса, теңгенің 18 пайызға құлдырауы бағаның қымбаттауына әсер етіп отыр. Әлеуметтік маңызы бар 19 тауардың қоры 1 млн-ды құрайды. Кейбір туар түрлерін сыртқа шығаруға тыйым салынды. Үй маңайындағы дүкендер әкімдіктердің түсіндіру жұмыстары негізінде тауар бағасын 15 пайызға дейін түсірді. Бағаны көтерген дүкендерге айыппұл саламыз. Ірі базарларда да тексеріс басталды. Оның ішінде «Алтын орда» базарына қатысты тексерісті Бас прокуратура аяқтады», - деді министр.

Алайда министрдің жауабына қанағаттанбаған депутат нақты жауап беруін сұрады.

«Мен түсінбедім! Нақты үш сұрақ қойдым. Сіз бірнеше жылдан бері министр болып отырсыз. Менің сұрағыма нақты жауап бермейсіз бе? Біріншіден, елдің азық-түлік бағасы жасалды ма? Екіншіден, қауіпсіздікті қамтамасыз ету үшін қандай жоспар бар? Бағаны ұстауға кәсіпкерлер мен бюджеттен басқа қандай жоспар бар? Осы сұрақтарға жауап бермедіңіз. Сөз көп, сорпаның ішінде түйір жоқ», - деді министрдің жауабына көңілі толмаған Жаңбыршин.

«Екі-үш жыл ішінде сырттан импорттап отырған 6 тауарды өзіміз шығарамыз», - деді Бақыт Сұлтанов.

×
Бұл желілік ресурстың ақпараттық өнімдері 18 жастан асқан адамдарға арналған.