ШҚО-да жылыту маусымында өрттен 22 адам көз жұмды

Azattyq Rýhy

Бұл өткен жылыту маусымына қарағанда 38%-ға аз

ШҚО-да  жылыту маусымында өрттен 22 адам көз жұмды
Фото ашық дереккөзден

ШҚО-да жылу маусымы басталғалы бері тұрғын үй секторында 433 өрт оқиғасы болып, 22 адам мерт болды. Бұл туралы ШҚО ТЖД Мемлекеттік өрт бақылау басқармасы бастығының орынбасары Нұржан Өміржанов мәлім етті, деп хабарлайды Azattyq Rýhy.

Жылыту маусымы басталғаннан бері тұрғын үй секторында өрт саны өткен жылдың сәйкес кезеңімен салыстырғанда 24 %-ға азайған. Өрт салдарынан 22 адам қаза тапты, бұл өткен жылыту маусымына қарағанда 38%-ға аз. Қайғылы жағдайға душар еткен себептердің бірі отты абайсыз қолдану, оның ішінде мас күйінде темекі шегу салдарынан болды.

Соңғы уақытта жазғы коттедждер мен бау-бақша аумағында өрт, көміртегі тотығымен улану жиі болып жатыр. Азаматтар саяжай үйлерін өрт қауіпсіздігі нормаларын, талаптарын сақтамай, қысқы тұру нұсқасы үшін қайта жабдықтайды, бұл кейіннен жазатайым оқиғаларға әкеп соғып жатады. 

Сондай-ақ тұрғын үй секторында тіркелген өрттердің жалпы санының 6%-ы жылыту кезеңінің басынан бастап саяжайларға тиесілі. 

«Өрттердің жиі кездесетін себептерінің бірі отты абайсыз қолдану, бұдан әрі электр желілерін, электр жабдықтарын пайдалану кезінде, сондай-ақ пеш жабдықтарын пайдалану кезінде өрт қауіпсіздігі талаптарын сақтамау болып қала береді. Өрт қауіпсіздігін қамтамасыз ету үшін азаматтық қорғау қызметкерлері күн сайын бүкіл жылыту кезеңі ішінде тұрғын үй секторы бойынша аулаларды аралайды. Бүгінгі күні жылыту маусымы басталғаннан бері 694 000 тұрғынды қамти отырып, 439 000-нан астам үй аулаларды аралаумен қамтылды. 101 593 үйде өрт қауіпсіздігі ережелерін бұзу фактілерін анықтады», - дейді Нұржан Өміржанов.

×
Бұл желілік ресурстың ақпараттық өнімдері 18 жастан асқан адамдарға арналған.