Жалпы қуаты 202 МВт болатын 13 майнинг-ферма анықталды – Энергетика министрлігі

Azattyq Rýhy

Олардың жұмысы тоқтатылды

Жалпы қуаты 202 МВт болатын 13 майнинг-ферма анықталды – Энергетика министрлігі
Фото ашық дереккөзден

Жақында Қазақстан Республикасы Энергетика министрлігі Атомдық және энергетикалық қадағалау мен бақылау комитеті аумақтық департаменттерінің қызметкерлері құқық қорғау және басқа да мүдделі мемлекеттік органдар өкілдерінің (бұдан әрі – мобильдік топ) қатысуымен цифрлық майнинг объектілерін анықтау мақсатында бірлескен тексерулер жүргізді. Мобильді топтар жүргізілген тексерулер нәтижесінде соңғы 5 күнде жалпы тұтыну қуаты 202 МВт болатын 13 майнинг-ферманы анықтап, жұмысын тоқтатты. Бұл туралы Azattyq Rýhy Энергетика министрлігіне сілтеме жасап хабарлайды.

Төменде цифрлық майнинг нысандары қызметінде анықталған фактілер бойынша мобильді топтар жұмысының нәтижелері толығырақ берілген.

«Цифрлық майнинг бойынша қызметті жүзеге асыру фактісі: Қарағанды облысында жалпы қуаты – 31,3 МВт., Павлодар облысында – 22 МВт., Түркістан облысында – 3,28 МВт, Ақмола облысында – 1,03 МВт., Қостанай облысында – 0,82 МВт, Нұр-Сұлтан қаласында – 1,8 МВт., Алматы қаласында – 3,5 МВт., Шымкент қаласында – 4 МВт.

Сондай-ақ цифрлық майнингке өздігінен шектеу енгізілген: Батыс Қазақстан облысында жалпы қуаты - 91 МВт, Қарағанды облысында – 44 МВт», - делінген хабарламада.

Майнинг фермаларын анықтау және электр желілерінен ажырату бойынша мобильді топтың жұмысы жалғасады, сондай-ақ анықталған майнинг фермалары бойынша уәкілетті органдар жедел тергеу іс-шараларын жүргізуде.

×
Бұл желілік ресурстың ақпараттық өнімдері 18 жастан асқан адамдарға арналған.