Бұқтырма су қоймасынан 178 келі балықты заңсыз аулаған ер адам ұсталды
Осының салдарынан мемлекетке 1 млн теңгеге жуық материалдық залал келтірілген
Шығыс Қазақстан облысындағы Бұқтырма су қоймасында заңсыз балық аулаған ер адам ұсталды. Бұл туралы ШҚО «Зайсан-Ертіс» облысаралық бассейндік балық инспекциясы мәлім етті, деп хабарлайды Azattyq Rýhy.
Балық инспекциясының мәліметіне сүйенсек, 8 ақпанда Бұқтырма су қоймасында заңсыз балық аулаған браконьер ұсталды. Инспекция мамандары ер адамнан 100 метр ау мен жалпы салмағы 178 келі балықты тәркіледі.
«Осының салдарынан мемлекетке 1 млн теңгеге жуық материалдық залал келтірілген. Қылмыстық іс қозғау үшін материалдар мен заттай дәлелдемелер Көкпекті аудандық полиция бөліміне жіберілді», - делінген ақпаратта.
Браконьер ҚР Қылмыстық Кодексінің 335-бабына (балық ресурстарын және басқа да су жануарларын заңсыз аулағаны үшін) сәйкес 3 мың АЕК мөлшерінде айыппұл төлеуге міндеттелуге немесе үш жылға дейінгі мерзімге бас бостандығынан айырылуы мүмкін.
