Қазақстандықтар жерді алу процесін онлайн форматта іске асыратын болады

«Халық үніне құлақ асатын мемлекет» қағидатына сәйкес орталық және жергілікті атқарушы органдардың басшылары халықпен тұрақты кездесулер өткізіп, олардың мәселелеріне дер кезінде ден қоятын болады. Бұл туралы Премьер-министр Әлихан Смайылов Үкіметтің кеңейтілген отырысында айтты, деп хабарлайды Azattyq Rýhy.

Мемлекеттік қызметтердің қолайлылығын және олардың сапасын жақсарту үшін проактивті цифрлық сервистердің тізбесі кеңейтілетін болады.

«Онлайн форматта жерді ашық беру және жеке тұрғын үй құрылысы үшін жер учаскелерін алуға кезектерді жүргізу қамтамасыз етіледі», - деді Әлихан Смайылов.

Азаматтық қоғам саласында тұтынушылардың құқықтарын қорғау жөніндегі заңнамалық бастамалардың 2-топтамасы қабылданады.

«Қоғамдық шарттың жаңа форматын қалыптастыру үшін ҮЕҰ өкілдерін, азаматтық белсенділерді, саяси партиялар мен БАҚ-ты кеңінен тарта отырып, қоғамдық кеңестердің жаңа құрамдары қалыптастырылатын болады», - деді Смайылов.