Алматыда дәрігерлер пациенттің аяғын ұзартып берді

Орталық қалалық клиникалық аурухана дәрігері, ортопед Қанат Тәуекелов Қызылордадан келген 34 жастағы тұрғынның аяғына күрделі операция жасады. Бірегей ота міндетті әлеуметтік медициналық сақтандыру пакеті аясында жасалды, деп хабарлайды Azattyq Rýhy.

Орталық клиникалық аурухананың баспасөз қызметінің мәліметінше, операция нәтижесінде пациенттің сол аяғы 5 сантиметрге ұзартылып, аяқтары теңестірілген.

Дәрігерлер пациентке «Жамбас сүйегінің туабітті кемістігі, 3-типтегі CROWE» диагнозын қойған. Ортопед маманның айтуынша, жігіттің оң аяғы сол аяғынан 6 см ұзын болған. Сондықтан ол бала күнінен балдаққа сүйеніп жүрген.

«Біз эндопротездің көмегімен сол жақ жамбас сүйегін толық ауыстырып, сол жақ жамбасты анатомиялық жағынан ұзарттық», - деді клиниканың ортопедия бөлімі меңгерушісі Қанат Тәуекелов.

Дәрігердің сөзінше, жамбас буынын эндопротездеу кезінде жамбастың басы, мойны мен ұршық толығымен жасанды протезге ауыстырылған.

«Мұндай жағдайда жамбас сүйегінің остеотомиясы деп аталатын тәсіл жақсы нәтиже береді. Ол аяқтағы ақауды түзетіп қана қоймай, аяқтың қызметін де айтарлықтай қалпына келтіруге көмектеседі. Ота 2,5 сағатқа созылды», - деді Қ.Тәуекелов.

«МӘМС пакеті арқылы осындай күрделі операцияларды жасатуға болады. Сақтандырылған тұрғындар бағасы қымбат болып келетін, жоғары технологиялардың көмегімен жасалатын қызмет түрлерін қажетінше пайдалана алады», - дейді МСҚ Алматы филиалы директоры Тілеухан Әбілдаев.