Елімізде денсаулық сақтау жүйесіне аудит жүргізіледі

Әсел Оршыбекова

2021 жылы денсаулық сақтау саласына жұмсалған мемлекеттік шығыстар 2,3 трлн теңгені құрады

Үкімет басшысы Денсаулық сақтау министрлігіндегі және Әлеуметтік медициналық сақтандыру қорындағы қаражаттың тиімділігін бақылауды үйлестіру және бағалау жүйесін сынға алды, деп хабарлайды Azattyq Rýhy.

2021 жылы денсаулық сақтау саласына жұмсалған мемлекеттік шығыстар 2,3 трлн теңгені немесе ЖІӨ-нің 2,9%-ын құрады. Бұл ретте денсаулық сақтауға арналған республикалық бюджет қаражатының 90%-ға жуығын ӘМСҚ әкімшілендіреді. Бұл туралы ҚР Премьер-министрі Әлихан Смайыловтың қатысуымен өткен денсаулық сақтау жүйесінің тиімділігін арттыру мәселелері жөніндегі кеңесте айтылды.

Премьер-министр ӘМСҚ-ның барлық көрсеткіші тым жалпыланған екенін және халықтың медициналық көмекке, сондай-ақ оларды қанағаттандыру үшін медициналық ұйымдарға деген нақты қажеттілігін айқын көрсетпейтінін атап өтті. Осыған байланысты Әлихан Смайылов Қор қызметін бақылау мен қаражатты тиімді жұмсау индикаторларының нақты жүйесін әзірлеуді тапсырды.

«Бүгінде өңірлердегі медициналық қызметтердің 100%-ы Қордан қаржыландырылады, бұл халыққа медициналық көмек көрсетуді ұйымдастыру жауапкершілігінің төмендеуіне алып келеді. Бұл әсіресе, өткен жылдың соңында Алматы мен Жаңаөзен қалаларында жедел медициналық көмек қызметін қаржыландыру және ұйымдастыру мәселелері туындаған кезде көрінді», — деді Үкімет басшысы.

Премьер-министр тегін медициналық көмектің кепілдік берілген көлемін қаржыландыруды кезең-кезеңімен жергілікті деңгейге бере бастауды тапсырды. Үкімет басшысы ӘМСҚ мемлекеттік қаражатты әкімшілендіруді біртіндеп тоқтатып, сақтандыру медицинасын дамыту мәселелеріне және қаржыландырудың қосымша көздерін іздеуге баса көңіл бөлуі қажет екенін атап өтті. Премьер-министр аз уақыт ішінде денсаулық сақтау инфрақұрылымына тәуелсіз кешенді техникалық аудит және түгендеу жүргізуді, оның ішінде жабдықтармен және медициналық-технологиялық жүйелермен жарақтандыруды, ана мен бала, онкология, травматология, кардио-нейрохирургия, инфекциялық аурулар сияқты басым бағыттар бойынша өңірлердің медициналық инфрақұрылымын дамыту картасын әзірлеуді тапсырды.

Сондай-ақ, ол медициналық персоналды дипломнан кейінгі оқыту бағдарламасын әзірлеп, денсаулық сақтау жүйесін заманауи жабдықта жұмыс істей алатын және жаңа технологияларды игере алатын кадрлармен қамтамасыз ету қажеттігін атап өтті. Үкімет басшысы Денсаулық сақтау министрлігіне уәкілетті органдармен бірлесіп, аз уақыт ішінде саланы басқару, инвестициялық жоспарлау, қаржыландыру және бюджетаралық қатынастар жүйесін жетілдіру бойынша шаралар қабылдауды тапсырды.

«Басты міндет – тиімді денсаулық сақтау жүйесін қалыптастыру. Барлық ұсыныстар әзірленіп жатқан және жуық арада бекітілетін Үкіметтің 2022 жылға арналған іс-қимыл жоспарына енгізілуі тиіс», — деді Әлихан Смайылов.

×
Бұл желілік ресурстың ақпараттық өнімдері 18 жастан асқан адамдарға арналған.