Қарағандыда арнайы экономикалық аймақ көрсеткіші есепке алынбаған – Есеп комитеті

Республикалық бюджеттің атқарылуын бақылау жөніндегі есеп комитеті 2021 жылғы маусымда арнайы экономикалық аймақтар қызметінің тиімділігіне мемлекеттік аудит жүргізді, деп хабарлайды Azattyq Rýhy.

«Аудит барысында аумақтарды дамытудың 2016-2020 жылдарға арналған бағдарламаларында өңірді әлеуметтік-экономикалық дамытуға арнайы экономикалық аймақтың әсерін сипаттайтын цифрлық және сапалық көрсеткіштер қамтылмағаны анықталды, бұл АЭА қызметі мен дамуынан түскен үлесті айқындауға мүмкіндік бермейді. Осыған байланысты Қарағанды облысының әкіміне өңірді әлеуметтік-экономикалық дамытуға бағытталған «Сарыарқа» АЭА-ның даму көрсеткіштерін қамту бөлігінде Қарағанды облысын дамытудың бағдарламасына өзгерістер мен толықтырулар енгізу мәселесін қарау бойынша шаралар қабылдау тапсырылды», − делінген Есеп комитетінің хабарламасында.

Есеп комитетінің тапсырмасын орындау үшін Қарағанды облысы мәслихатының 2021 жылғы 9 желтоқсандағы IХ сессиясының шешімімен «Өндіріс, сауда, және логистика – экономика орнықтылығының үштігі» бағыты бойынша «Сарыарқа» АЭА-ның аумағында жобаларды іске асыру шеңберінде негізгі капиталға инвестицияларды тарту» нысаналы индикаторын көздейтін Қарағанды облысын дамытудың 2021-2025 жылдарға арналған бағдарламасы бекітілді.