Германия әскери-теңіз күштерінің басшысы Қырымды қайтару туралы пікірінен кейін отставкаға кететінін растады

Германия әскери-теңіз күштерінің Бас қолбасшысы Кай-Ахим Шенбах Қырымды Украинаға қайтару мүмкін еместігі туралы мәлімдемеден кейін отставкаға кететінін растады. Бұл туралы BILD агенттігі хабарлады.

Шенбах отставкаға кету туралы өтініш бергенін және қорғаныс министрі Кристин Ламбрехт оны мақұлдағанын айтты.

"Мен федералды қорғаныс министрінен мені әскери-теңіз күштерінің Бас қолбасшысының міндеттерін орындаудан дереу босатуды өтіндім. Федералды министр менің өтінішімді қанағаттандырды", - деді Шенбах.

Ол мұндай қадамды Германия, Бундесвер және жалпы Германия флотына одан әрі зиян келтірмеу үшін қажет деп санайды.

Әскери-теңіз күштерінің жаңа Бас қолбасшысы сайланғанға дейін оның міндетін Шенбахтың орынбасары адмирал Ян Кристиан Каак атқарады.

Бұған дейін Шенбахтың Қырымды қайтару туралы резонанстық мәлімдемесінен кейін отставкаға кету ниеті туралы Spiegel хабарлады. Оның айтуынша, ГФР Қорғаныс министрі Төтенше жиналыста Бундесвердің бас инспекторы Эберхард Цорнмен жағдайды талқылады. Олар Шенбах өз мәлімдемелерін дереу ашық түрде түсіндіруі керек деген қорытындыға келді.

22 қаңтарда Үндістанның қорғаныс зерттеулер институтының конференциясында Германияның вице-адмиралы Кай-Ахим Шенбах Қырым Украинаға "ешқашан оралмайды" деп мәлімдеген болатын. Оның пікірінше, бұл факт.

Германияның қорғаныс министрлігі Шенбахтың түбектің құрамына қатысты ұстанымымен келіспейтінін мәлімдеді.

"Бұл мәлімдемелер мазмұны мен тұжырымдары бойынша ешқандай жағдайда Министрліктің ұстанымына сәйкес келмейді", - деп хабарлады ведомство.