Алматы облысында жаппай тәртіпсіздік кезінде 337 адам дәрігер көмегіне жүгінді

Алматы облысында жаппай тәртіпсіздік кезінде 337 адам медициналық көмекке жүгінді. Оның ішінде 13 адам - әскери қызметкер. Бұл туралы Алматы облысы денсаулық сақтау басқармасының басшысы айтты, деп хабарлайды Azattyq Rýhy.

Қазіргі таңда түрлі дене жарақатын алған 109 адам ауруханада ем қабылдап жатыр. Алматы облысы денсаулық сақтау басқармасының басшысы Өмірзақ Ниязбеков дәрігерлерге митингке қатысқандар тарапынан шабуыл жасалмағанын да атап өтті.

«Көшедегі тәртіпсіздікке қарамастан дәрігерлер мен жедел жәрдем қызметкерлері штатты режимде жұмыс істеді. Дәрігерлерге митингке шыққандар шабуыл жасаған жоқ. Жаппай тәртіпсіздік кезінде облыстық жедел жәрдем станциясының бір қызметкері зардап шекті. Жедел жәрдем көлігіне атқан оқтың салдарынан сынған әйнек жүргізушіні жарақаттаған. Қазіргі таңда көлік жүргізушісінің жағдайы тұрақты. Амбулаториялық ем қабылдап жатыр», - деді басқарма басшысы.

Митингке қатысқандар 5 жедел жәрдем көлігіне зақым келтірген. Облыста тәртіпсіздік орын алған кезде жалпы саны 206 жедел жәрдем көлігі медициналық қызмет көрсетті.