Қазақстанның барлық өңірінде ХҚО-лар жұмысы қалпына келтірілді – министрлік

6 қаңтарда Қазақстанда төтенше жағдай режимінің енгізілуіне байланысты ХҚО-лардың жұмысы уақытша тоқтатылған

Фото ашық дереккөзден

12 қаңтарда Алматы облысының ХҚО-лары қайта қызмет көрсете бастады. Жұмыс кестесі 9:00-ден 17:00-ге дейін (дүйсенбі-жұма аралығында). Бұл туралы Azattyq Rýhy Цифрлық даму, инновациялар және аэроғарыш өнеркәсібі министрлігіне сілтеме жасап хабарлайды.

Еске сала кетейік, 6 қаңтарда Қазақстанда төтенше жағдай режимінің енгізілуіне байланысты ХҚО-лардың жұмысы уақытша тоқтатылған болатын.

10 қаңтарда ХҚО-лар Алматы қаласы мен Алматы облысын қоспағанда, Қазақстанның барлық өңірінде іске қосылған.

Ал 11 қаңтарда Алматы қаласының ХҚО-лары жұмыс істей бастады. Қазіргі уақытта ХҚО-лар еліміздің барлық өңірінде жұмыс істеп тұр.