Астанада бір тәулікте 8 қылмыстық іс тіркелді – комендатура

Елордада жедел ахуал тұрақты. Бір тәулік ішінде 8 қылмыс тіркелді. 83 жол-көлік оқиғасы орын алып, салдарынан 2 адам жарақат алды. Бұл туралы елорданың комендатурасының баспасөз қызметі мәлім етті, деп хабарлайды Azattyq Rýhy.

464 әкімшілік құқық бұзушылық анықталды. Оның 183-і қалада тұру ережесін бұзу, қоғамдық орындарда ішімдік ішудің 36 және көші-қон заңнамасын бұзудың 18 дерегі тіркелді.

«Қазіргі таңда 6 блокбекет жұмыс істеп тұр. Төтенше жағдай режимін бұзған 200-ден астам адам жауапкершілікке тартылып, оның 28-і әкімшілік қамауға алынды.

Тек ресми ақпаратқа сеніңіздер. Өкінішке орай, жалған ақпарат тарату деректері де тіркеліп отыр. Қазіргі таңда 3 қылмыстық іс қозғалды.

Осындай әрекеттерге барғаны үшін ҚР Қылмыстық кодексінің 274-бабына сәйкес, жеті жылға дейін бас бостандығынан айыру жазасы көзделген», - делінген хабарламада.

Сол сияқты төтенше жағдай ахуалында қылмыстық немесе әкімшілік құқық бұзушылық жасалғаны үшін жауапкершілік күшейтілгені айрықша аталып өтті.