Астана «сары» аймаққа қайта өтуі мүмкін

15 желтоқсаннан бастап елорда эпидемиологиялық жағдайды бағалау матрицасы бойынша «жасыл» аймаққа кірген. Алайда, коронавирустық инфекцияның таралу қарқыны бойынша Нұр-Сұлтан «сары» аймаққа қайта оралуы мүмкін, деп хабарлайды қалалық әкімдіктің ресми сайты.

«Бүгінгі таңда коронавирустық инфекцияның даму қарқыны бойынша Нұр-Сұлтан қаласында Rt -0,993 репродуктивті саны бар, яғни 1,0-ге өте жақын, одан асып кеткен кезде қала «сары» аймаққа көшеді. Rt репродуктивті саны аймақтарды анықтау критерийлерінің бірі болып саналады», - деп хабарлады елорданың санэпидбақылау департаменті.

Елордада бір апта ішінде КВИ ауруының өсуі байқалады, соның әсерінен Rt саны өсуде. Қала «жасыл» аймақта жеті-ақ күн болды, ары қарай қосымша жеңілдіктер енгізілуі керек еді. Алайда, мерекеден кейінгі тұрақсыз жағдайды ескере отырып, эпидемиялық жағдайды тағы бірнеше күн бақылау жоспарланып отыр. Егер коронавирустық инфекция бойынша шағымдарды қарау көбеймесе, онда сәйкесінше жеңілдіктер енгізіледі.

«Нұр-Сұлтан қаласының санитарлық-эпидемиологиялық бақылау департаменті азаматтарды маска режимін, әлеуметтік қашықтықты сақтауға, бұқаралық іс-шараларға қатыспауға шақырады. Алдын-ала әрекет ету қажет, тек вакцинация мен ревакцинация аурудың ауыр ағымының қаупін азайтады. Бүгінгі таңда одан басқа сенімді қорғаныс жоқ!» - деп жазды елорда әкімдігі.