Райымқұлова ауыр атлет Жасұлан Қыдырбаевтың мәлімдемесіне жауап берді

Жуырда ғана белгілі ауыр атлет Жасұлан Қыдырбаев еліміздегі ауыр атлетика спортындағы проблемаларды айтып, федерацияны біліксіз мамандардың қолына бергеніне ренішті екенін алға тартқан болатын. Спортшы «Алексей Ни құраманы басқарды. Кейін соның шәкірті Бақыт Ахметов келді. Ол – қырғыз. Сонда қанша қазақ бапкер жүр. Қанша спортшы жүр. Солардың біреуі лайық емес пе? Біресе корейді қойды, біресе қырғызды қойды. Соған іштей өкінішім бар» деген болатын.

Бүгін Орталық Коммуникациялар алаңында журналистермен кездескен Мәдениет және спорт министрлігі Жасұланның сұхбатын көргенін айтты және ауыр атлетикадан ұлттық құрама бапкерлері арасындағы дауға қатысты жауап берді.

«Жасұлан Қыдырбаевтың сұхбатын көрдім. Жасұланның допинг пайдаланғаны анықталып, ұлттық құрама мен жарыстардан алынған. Нидің кезінде Светлана Подобедова, Зульфия Чиншанло, Илья Ильиннің медальдары алынғаннан кейін, Алексей Ни бас бапкерлік лауазымынан да, ұлттық құрамадан да шеттетілген. Ни Ташкентте өтіп жатқан сайысқа мемлекет атынан барған жоқ және оған біздің тараптан қазір ешқандай қолдау жоқ», - деді вице-министр Жарасбаев Серік.

Министрдің сөзінше, соңғы кездері басы даудан арылмаған ауыр атлетика федерациясына жыл соңына дейін бас бапкер тағайындалады.

«Спорт және дене шынықтыру спорты заңының бабы бойынша, жоғары дәрежелі спортқа мемлекет тапсырысымен Ұлттық Олимпиада комитеті жауап береді. Министрлік пен комитет арасында келісімшарт жасалған. Сондай-ақ, әр спорт түрі бойынша федерациялар бар. Сол федерациялардың басшылары мен әкімшіліктері барлық жұмысты жүзеге асырады. Заң бойынша, құрама командалардың бас бапкерлерін, жалпы бапкерлерін қою үшін федерацияның ұсынымы болуы керек. Ол ұсыным Ұлттық Олимпиада комитетімен бірге келісілуі керек. Жыл соңына дейін аталған мәселе шешіледі деп ойлаймын. Ал Ниді Ташкенттегі әлемдік чемпионатқа ешкім жіберген жоқ, өз тарапынан барған адам. Ауыр атлетиканың федерация отырысында бас бапкерлікке қатысты мәселе талқыланады. Өз кезегінде біз өз кандидатурамызды ұсындық»,-деді Ақтоты Райымқұлова.