Нұр-Сұлтанда жыл басынан бері мас күйінде көлік жүргізген 1200-ге жуық адам жауапқа тартылды

Елорданың Полиция департаменті жыл басынан бері 130 мыңнан астам жол қозғалысы ережелерін бұзғандардың жолын кесті. Сол сияқты көлікті мас күйінде жүргізгені үшін 1 181 жүргізуші ұсталды. Бұл туралы Azattyq Rýhy елордалық Полиция департаментіне сілтеме жасап хабарлайды.

1 400-ден астам апаттық жағдайларды туғызу фактілерінің жолы кесілді. 16 653 жаяу жүргіншіге айыппұл салынды.

Жүргізушілер арасында көлік тәртібін күшейтуге бағытталған «Мас жүргізуші – қылмыскер», «Автобус», «Назар аударыңыз бағдаршам», «Назар аударыңыз балалар», «Қауіпсіз жол» және т.б. жедел-алдын алу іс-шаралары жүргізілуде.

«Қауіпсіз жол» жедел алдын алу іс-шарасын өткізудің алғашқы екі күнінде департамент қызметкерлері мүдделі органдармен бірлесіп, жол қозғалысы ережелерін бұзудың 1436 дерегін анықтады.

• 20 көлікті мас күйінде басқару;
• апатты жағдай тудырғаны үшін 19 бұзушылық анықталды;
• 33 қарама-қарсы бағытқа шығып кету;
• 37 бағдаршамның тыйым салынған белгісіне өту;

238 жаяу жүргіншілердің жолдың жүру бөлігін кесіп өту сынды фактілер анықталып, барлығы 82 автокөлік айыппұл тұрағына орналастырылды.

Елордалық Полиция департаменті жолдарда өте мұқият болуды, ауа райының әсерін, жауын-шашын кезінде көрінудің төмендеуін, көктайғақ жағдайында тоқтаудың ұзаратынын еске салды.

Жыл басынан бері үш мыңға тарта жүргізуші оқиға орнынан кетіп қалған. Жол-көлік оқиғасына қатысы бар жүргізуші ізін суытқаны үшін 50 АЕК мөлшерінде айыппұл немесе бір жыл мерзімге көлік құралдарын басқару құқығынан айыру түрінде жаза қолданылады.