Мектеп директорларының жалақысы қаншалықты өседі?
2022 жылы қазақстандық мұғалімдердің жалақысы артады
Білім және ғылым министрі Асхат Аймағамбетов педагогтердің Республикалық тамыз конференциясының пленарлық сессиясында мектеп директорларының жалақысы жөнінде сөз етті.
«Қазір мектеп басшыларына еңбекақы төлеу мәселесі өзекті өртеп тұр. Бәсекеге қабілетті менеджерлер қазіргі жалақыға мектеп басшысы ретінде жұмыс істегісі келмейді. Жалпы, үздік педагогтер мектеп меңгеруші және директор болғысы келмейді. Сондықтан, бұл жүйеде өзгерістер қажет», - деді министр.
Министрдің айтуынша, мектеп директорларының жалақысы мұғалімдерге қарағанда төмен болатын жағдайлар бар, бұл өз кезегінде әртүрлі тәуекелдерді тудырады.
«Білім және ғылым министрлігі еліміз бойынша мектеп директорларының еңбегіне ақы төлеу жүйесіне өзгерістер енгізуді, оның ішінде ұйымдардың әртүрлі түрлері бойынша еңбекақы төлеуді саралауды жоспарлап отыр. Айтайын дегенім, біз 40 баласы бар және 1200-2000 баласы бар мектептердің директорларына бірдей жалақы төлейміз. Мұндағы жүктеме мен жауапкершілік деңгейі әртүрлі екені анық. Біз бұл туралы айтқан болатынбыз және министрлік тиісті шешімді дайындауда», - деп түсіндірді БҒМ басшысы.
Сонымен қатар министр 2022 жылы педагогтердің жалақысын көтеру туралы шешімді мәлімдеді.
«2022 жылдың қаңтарында балабақша, мектеп және колледж педагогтерінің жалақысы тағы 25 пайызға көтеріледі. 2021 жылдың қыркүйегінен бастап педагогтарды жұмысқа қабылдау жүйесі өзгеруде», - деді ведомство басшысы.
