Қазақстандағы әрбір екінші ересек азамат екпенің І компонентін алды - Алексей Цой

ҚР Денсаулық сақтау министрі Алексей Цой ОКҚ-да өтіп жатқан брифингте вакцинациялау науқаны қалай жүріп жатқанын айтты, деп хабарлайды Azattyq Rýhy тілшісі.

«Іс жүзінде, Қазақстандағы әрбір екінші ересек азамат коронавирусқа қарсы вакцинаның бірінші дозасын алды», - деп хабарлады Алексей Цой.

Оның мәліметінше, бүгінге дейін вакцинаның 8,6 млн дозасы пайдаланылды. Вакцинаның І компонентін 5 млн 230 мың 750 адам алған. Бұл вакциналауға жататын халықтың 52,8%-ын құрайды. Екінші компонентін 3 млн 436 мың 617 адам алған.

Денсаулық сақтау министрі егу пункттерінде вакцинаның 713 мыңға жуық бірінші компоненті және 1,3 млн доза екінші компоненті барын айтты.

«Науқастардың 99,9% вакцинацияланбаған тұрғындар екенін атап өткім келеді. Бұл иммундаудың қауіпсіздігі мен тиімділігін растайды. Вакцинация - коронавирус инфекциясынан болатын ауыр ағым мен өлімді болдырмаудың жалғыз тиімді әдісі. Сондықтан әрбір қазақстандықтан вакцинациялау туралы саналы шешім қабылдауды, өзін, жақындарын қорғауды және елімізде ұжымдық иммунитетті қалыптастыруға өз үлесін қосуды сұраймын», - деді министр.