«Дайындық емес, демалыс керек еді». Тұрсынғали Еділов Токиодағы фиаско туралы пікірін айтты

Токио Олимпиадасына аттанған қазақстандық 9 боксшының бесеуі - Абылайхан Жүсіпов, Василий Левит, Серік Теміржанов, Бекзад Нұрдәулетов және Надежда Рябец жарыс жолынан шығып қалды. Осыған орай, белгілі жаттықтырушы Тұрсынғали Еділов Токиодағы додаға қатысты Vesti.kz тілшісіне пікірін білдірді.  

«Өкінішке қарай, жүлдеден үміт күткен спортшылар жарысты ерте аяқтап жатыр. Левиттің төмен нәтиже көрсететінін ешкім күткен жоқ. Өте тәжірибелі боксшы. Қаншама жарыста сыналған, шыңдалған. Олимпиадаға барамын деп бірнеше оқу-жаттығу жиындарын өткізді. Бірақ жігіттердің шаршап қалғаны көрініп тұр. Содан кейін тағы да Азия чемпионатын еске аламыз. Сол сары құрлық турнирі бізге керек пе еді деген сұрақ туындайды. Бапкерлік штаб осының барлығын ескеріп, Олимпиада ойындарына дайындықты басқаша өткізуге тиіс еді. Токиоға барған жігіттердің барлығының тәжірибесі бар. Оларға дайындық емес, үлкен жарыстың алдында демалыс керек еді. Бұрын мен ұлттық құраманың бас бапкері болып тұрғанда бір жарысқа барсақ, төрешілердің тарапынан бізге жасап жатқан әділетсіздігін байқасақ, бірден орта жолда турнирді тастап кетіп қалатынбыз», - деді ол.

Ардагер бапкер «Қазақтың салмағы» деп аталып кеткен 69 келідегі Абылайхан Жүсіпов жайлы да айтты.  

«Абылайхан Жүсіпов те үмітті ақтай алмады. Рингке шыққан соң қарсыласыңның бір соққысына екі соққымен жауап қайтаруың керек. Боксшы деген жанып тұру керек қой. Бізде қазақ боксы кезіндегі Кеңес боксынан бастау алады. Жарысқа баратын спортшыларға дайындықты тым көп жасатқызады. Қысым көп болады. Американың методын қарасаңыз оларда еркіндік бар. Сондықтан үлкен жарыстардың алдындағы дайындықтың методикасын өзгерту керек», - деді ол.

Еске салайық, Тұрсынғали Еділов 1997 және 2002 жылдары бокстан Қазақстан ұлттық құрамасының бас бапкері міндетін атқарды. 2000 жылы Сидней Олимпиадасында Еділовтың басшылығымен төрт отандасымыз Жазғы ойындардың финалына шыққан болатын. Нәтижесінде Бекзат Саттарханов және Ермахан Ибраимовтар алтыннан алқа тағынса, Болат Жұмаділов пен Мұхтархан Ділдәбековтер күміспен күптелген еді.