Қазақстанға уақытша әкелінген көліктер 30 қыркүйекке дейін шығарылуы керек
Талапты орындамаған жүргізушілер көліктің кедендік төлемі мен салығын толық төлеуі тиіс
Елімізге уақытша әкелінген көліктерді иелері 30 қыркүйекке дейін елден шығаруы керек, деп хабарлайды Azattyq Rýhy.
«Бұл мерзім Еуразиялық экономикалық одақтың кедендік аумағына шетел яғни үшінші мемлекеттерден уақытша әкелінген автомобильдер мен басқа да көліктерге қатысты. Осы мерзім Еуразиялық экономикалық комиссия кеңесінің 2021 жылғы 5 сәуірдегі №25 шешімінде көрсетілген», - делінген Мемлекеттік кірістер комитетінің баспасөз хабарламасында.
Бұл шешім одақтың кеден аумағында болу уақытының пандемияға байланысты 18 айға ұзартылған мерзімін тоқтатты.
«Осыған байланысты одаққа тұрақты тұру үшін көшіп келген шетел азаматтарының, босқындардың, мәжбүрлі түрде көшіп келушілердің одақтың кедендік аумағына баж алымынсыз жеке мүлігінін алып келуге қатысты жеңілдік болған. 2021 жылғы 30 қыркүйекке дейін көліктер әкетілмеген жағдайда кедендік төлемдер мен салықтар толық көлемде төленуі тиіс», - делінген хабарламада.
