Дəптер тексергені үшін мұғалімдерге екі есе көп ақы төленеді

Сынып алып, дəптер тексергені үшін ұстаздарға қазіргі қосымша ақыдан екі есе артық ақша төлеу ұсынылып отыр. Бұл туралы бүгін Мəжілісте «Педагог мәртебесі» заң жобасын таныстырған Білім жəне ғылым министрі Асхат Аймағамбетов мəлім етті.

«Заңға енгіземіз деп көздеп отырған маңызды бағыттың бірі - ұстаздарды материалдық ынталандыру. Өздеріңіз білетіндей, қазір ұстаздардың жалақысы ел бойынша орташа жалақыдан төмен, яғни, 110 мың теңге. Министрлік​ бірнеше рет жалақыны көтеруге тырысты, бірақ, басқа салалардағы жалақы ылғи да ұстаздар жалақысынан асып түсіп отырды», - дейді министр.

Сондықтан, заң жобасы мұғалімдердің құзіретін арттыру, материалдық ынталандыру шараларын да қарастырып отыр. Жəне министр сендіргендей, заң жобасы көздеген бүкіл қаржылық бастамалар үшін бюджеттен қаражат бөлінетіні анық.

Сондай материалдық ынтаның бірі - сынып алып, дəптер тексеру үшін төленетін қосымша ақы. Заң жобасы бойынша осы үстеме ақыны екі есе көбейту көзделіп отыр. Сондай-ақ, педагогикалық шеберлігі үшін де ақы артады. Ең бастысы, ел бойынша бүкіл ұстаздардың демалысы 56 күнге теңеледі.

«Мектептердегі ұстаздардың сапалы əлеуетін қалыптастыру үшін магистр дəрежесі бар педагогтарға 10 АЕК көлемінде қосымша ақы төлеу көзделіп отыр. Қазір мектептерде жұмыс істеп жатқан 5029 магистр осы ақыны алады»,- деді министр.

Кенжекей Тоқтамұрат, Нұр-Сұлтан