Мектеп оқушысы банк клиенттеріне ыңғайлы мобильді қосымша жасады

Алматы қаласы физика-математика бағытындағы Назарбаев зияткерлік мектебінің 11 «М» сынып Любовь Дудченко Baiterek hackathon - 2019 инновациялық жобалар байқауында «Үздік IT-жоба» номинациясы бойынша бірінші орынды жеңіп алды, деп хабарлайды Azattyq Rýhy  ҚазАқпаратқа сілтеме жасап.

Өз жобасын жүзеге асыру үшін Любовьқа ұйымдастырушылар тарапынан 1 000 000 теңгелік сертификат берілді.

Хакатонға қатысуға 550-ден астам өтінім келіп түссе, оның 200-ден астамы ғана іріктеуден өткен. Республикалық байқаудың финалы 29 қараша мен 1 желтоқсан аралығында «Қазақстанның тұрғын үй құрылыс жинақ банкінің» ұйымдастыруымен, «Бәйтерек» Ұлттық басқарушы холдингі мен QazTech Ventures компаниясының қолдауымен Алматы қаласында өтті.

Любовь Дудченко жоба бойынша серіктестері Ильяс Ахметов және Есентай Құрманбаевпен бірге банк үшін салымшы бонустарын жинап, өзінің виртуалды үйін құрастыра алатын мобильді қосымша әзірлеп шығарған.

«Бұл банк клиенттері салымының қарқынын арттыруға көмектеседі. Сонымен қатар, бұл қосымшада жеке куәлікті сканерлеудің арнайы функциясы бар. Оның көмегімен банктегі кезекті қысқартуға болады, себебі сауалнама толтыру және клиенттердің мәліметтерін деректер базасына жіберу автоматты түрде жүргізіледі», - дейді Любовь.