Шымкенттік шенеунікке Қазақстан азаматтығы уақытша қайта берілді

Шымкентте жоғары лауазымды шенеунікке, Қазақстан азаматтығы қайтарылады. Қалалық «Дене шынықтыру және спорт» басқармасының басшысына мұндай мүмкіндік уақытша сот жұмыстары аяқталғанша беріліп отыр. Бұл туралы басы дауға қалған Олег Почиваловтың өзі бүгін баспасөз жиынында мәлімдеді, деп хабарлайды Azattyq Rýhy «Астана» телеарнасына сілтеме жасап.

Бұған дейін оны ел азаматтығынан айыру мәселесі көтерілген болатын. Еске салайық, өткен аптада полиция «Дене шынықтыру және спорт» басқармасының басшысы Ресей азаматы дегенді айтқан еді. Алайда шенеунік мұны теріске шығарды. Шенеунік құқық қорғау органындағылардың бұл дерегін «жалған, өзіне қарсы ұйымдастырылған әрекет» деді.

«Ақпарат құралдары мен ғаламторда тараған деректің бәрі жалған. Бұл – бізге қарсы топтың, яғни қаланың игілігі мен азаматтарымыздың, спорттың дамуы үшін жұмыс істегісі келмейтіндердің әрекеті. Мен Қазақстан азаматы болғанмын және бола да беремін. Түсіндіңіздер ме?», - деді Шымкент қалалық Дене шынықтыру және спорт басқармасының басшысы Олег ПОЧИВАЛОВ.

Олег Почивалов полицейлердің үстінен прокуратураға шағымданған. Шенеуніктің адвокаты Ресей тарапы ұсынды делінген құжаттың бұрмаланғанына сенімді. Жазбаша мәліметте оның көрші елдің азаматтығын алғаны туралы айтылған деп көрсетілгенімен, құжаттарда сәйкестік жоқ деді заңды өкілі.