Зарина Дияс Australian Open турнирін жеңіспен бастады

Аустралияның Мельбурн қаласында теннистен мәртебелі турнирлердің алғашқысы - Australian Open басталды. Турнирге қатысып жатқан қазақстандықтар арасынан алғашқы болып жекелей сында Зарина Дияс бірінші айналымнан өтті.

Қазақстандық теннисші алғашқы матчта словениялық Тамара Зиданшекті екі сет қорытындысы бойынша ұтты (6:1, 7:5). Кездесу 1 сағат 22 минутқа созылды. Зарина Дияс - WTA рейтингінде 81-ші, Зиданшек 132-ші орында тұр.

Өкінішке қарай, бала күтіміне байланысты үзілістен соң теннис кортына қайта оралған Ярослава Шведова жекелей сында жарысты ерте аяқтады. Ол алғашқы айналымда италиялық Камила Джорджиге есе жіберді (3:6 3:6).

Дүниежүзілік рейтингте 90-орында тұрған қазақстандық теннисші Михаил Кукушкин бірінші айналымда әлемнің 3-ракеткасы, өткен жылғы US Open турнирінің жеңімпазы, австриялық Доминик Тиммен кездесті. Тартысты өрбіген бірінші партия тай-брейкке дейін жетіп, онда Д.Тим басым болды – 7:6 (7:2). Австриялық теннисші екінші сетте де, үшінші партияда да басым түсті. Бәсеке 2 сағат 40 минутқа созылды.