Алматыда қатерлі ісікке шалдыққандар саны көбейді

Алматыда онкологиялық ауруға шалдыққандар саны күрт көбейген. Өткен жылы 14 мыңнан астам науқас Алматы онкологиялық орталығында ем қабылдаған, деп хабарлайды Azattyq Rýhy тілшісі. 

Алматы қаласында өткен жылы қатерлі ісік ауруымен ауырған науқастар саны 2019 жылмен салыстырғанда 1733 адамға көбейген. Өткен жылы бұл көрсеткіш 14 546 науқасты құраса, 2019 жылы 12 813 науқас онкологиялық дертінен емделген. Соңғы кездері қатерлі ісіктің үш түрі кең тарап келеді. Ең көп таралған түрі – сүт безі қатерлі ісігі, одан кейінгі орындарда ішек пен асқазан қатерлі ісіктері.

«Алматы онкологиялық орталығының хирургтары аптасына 45-55 ота жасайды. Мәселен, өткен жылы 2514 ота жасалған. Олардың ішінде кеуде қуысы, іш, онкоурология, бас және мойын ісіктеріне арналған операциялар бар. Олардың 40% инвазивті, яғни лапароскопиялық жолмен жасалатын оталар», - деді онкохирургия бөлімінің меңгерушісі Нұрлан Балтаев.

Бүгінде алматылық мамандар ісікті жою оталарын жасап қана қоймай, анатомиялық ақауларды пластикалық жолмен жоюды жүзеге асырып жүр. Дәрігерлер дертті анықтайтын технологияның қолжетімді болғанына қарамастан, адамдар көбінесе ауруы асқынған соң келетінін айтады. Ал бұндай жағдайда операция да ауыр өтіп, науқастың сауығып кетуі де ұзаққа созылады.

 «Мәселен, былтыр тілдің түбірінің қатерлі ісігі диагнозы қойылған науқасқа ота үстелінде анатомиялық ақауларды пластикалық жолмен жоя отырып, күрделі ота жасалды. Операция бинокулярлық оптика астында 7 сағатқа созылды. Көлемі 20 см болған ісікті дәрігерлер терімен бірге алып тастаған. Ота барысында бұлшық ет пен мойынның үлкен тамырлары да жойылды, өйткені ол жерлерде де ісік өскен. Мойынның жартысына жуығы алынып тасталды. Осыдан кейін анатомиялық ақауларды пластикалық жолмен жою жүргізілді. Тері дененің басқа бөлігінен, атап айтқанда, кеуденің алдыңғы қабырғасынан артериямен қоса тамыры алынып, жатыр мойнындағы ақауды жабу үшін тігілген. Ота сәтті өтіп, науқас қазіргі уақытта тек сөйлей ғана емес, сонымен қатар өздігінен тамақтана алады»,- деді Алматы онкологиялық орталығының дәрігері.

Әмірболат Құсайынұлы,  Алматы