ШҚО, Павлодар, Қостанай, Қарағанды облыстарында бірнеше теміржолдың қызметі толығымен тоқтатылды

Көлік комитеті магистральдық және станциялық жолдарды күтіп ұстауға жауап беретін «Қазақстан темір жолы» ҰК» АҚ магистральдық теміржол желісі дирекциясының филиалдарында теміржол көлігіндегі қозғалыс қауіпсіздігін қамтамасыз ету бойынша тексеру жүргізді.

Қазан айындағы тексеру нәтижесінде жолаушылар мен жүк пойыздары жүретін теміржолдарда қозғалыс қауіпсіздігіне қауіп төндіретін 1000-нан астам заңбұзушылықты анықталды.

Тексеру қорытындысы бойынша теміржолдарды күтіп ұстау бойынша заңбұзушылықтарды жою туралы нұсқамалар берілді. Пойыздар қозғалысының қауіпсіздігіне қатер төндіретін өрескел заңбұзушылықтарға байланысты тексеру кезінде 127 теміржол және 108 бағыттамалы бұрмаларды пайдалану тоқтатылды, 350 жылдамдық шектеулері берілді, сондай-ақ арнайы жылжымалы құрамның 56 бірлігі пайдаланудан қалып қойды. Заңбұзушылықтарды жойғанға дейін ШҚО, Павлодар, Қостанай, Қарағанды облыстарында және басқа да облыстарда бірнеше теміржолдың қызметі толығымен тоқтатылды, бұл жолаушылар және жүк пойыздарының қозғалыс кестесіне өзгеріс енгізді.

Биыл он айда теміржол көлігі субъектілері қозғалыс қауіпсіздігін бұзудың 826 оқиғасына жол берді, ол бойынша көліктік бақылау қызметкерлері 53 млн теңгеге жуық сомаға әкімшілік материал толтырды.

Теміржол көлігіндегі қозғалыс қауіпсіздігінің жай-күйін талдау өткен жылдың ұқсас кезеңімен салыстырғанда, заңбұзушылықтардың өскенін көрсетті: 2019 жылы 808 заңбұзушылық тіркелді.