Алматы облысында мектепке дейінгі ұйымдардың жұмысы тоқтайды
Өңірде карантин шаралары күшейтіледі
Алматы облысында коронавирустың таралуы күрт көбейгендіктен шектеу шаралары енгізілді. Өңірдің бас санитарының жаңа қаулысы бойынша 15 адамнан аспайтын кезекші топтардан басқа мектепке дейінгі барлық меншік нысандары жабылады. Қоғамдық көліктердің қозғалысына да шектеу енгізілді.
Қыркүйек айында өңірде 74 тұрғынынан короновирус анықталса, қазанда бұл көрсеткіш 138-ге жеткен. Қауіпті вирусты жұқтырғандардың көбі Талдықорған, Текелі қалалары мен Қарасай, Еңбекшіқазақ аудандарында тіркеліп отыр. Сырқаттанғандар санының артуына байланысты өңірде карантиндік шектеулер енгізілмек.
Ертеңнен, яғни 29 қазаннан бастап аймақта кинотеатрлар, караоке мен түнгі клубтар, көңіл көтеру орындары, атракциондар мен бассейндер қызметтерін толық тоқтатады. Көлік жуу және жөндейтін нысандар кешкі алтыға дейін ғана жұмыс істейді. Жаттығу залдары, ойын сауық орталықтары 30, моншалар 50 проценттік толтырылым негізінде қызмет көрсетеді.
Мейрамханалар мен кафелердің қызметі түнгі сағат онда дейін ғана болады. Сенбі, жексенбі күндері 2 мың шаршы метрден асатын киім-кешек сататын дүкендер мен тамақтану орындары мүлдем ашылмайды.
«Сенбі, жексенбі күндері тамақтану орындары 100 пайыз жабылады. Өйткені осы кезде той-томалақ көп өтеді. Біз адамдардың топтасуын тоқтата алмай отырмыз. Сондықтан осындай шектеу енгіздік. 65 жастан асқан адамдардың көшеге шығуына, бір отбасы мүшелерінен басқа, 3 адамнан артық топтың жиналуына тыйым салынады. Қаулы 29 қазан 07 сағаттан бастап күшіне енеді»,- деді Алматы облысы бойынша тауарлар мен көрсетілетін қызметтердің сапасы мен қауіпсіздігін бақылау департаментінің басшысы Ерғали Сыдыманов.
