Елордада жаңа көпір салынады

Елордада жаңа көпір салынады. Ол тәуелсіздік сарайынан бастап, Керей, Жәнібек хандар көшесіне дейінгі аралықты жалғайтын болады. Бұл шаһардағы көлік кептелісін азайтуға мүмкіндік бермек, деп хабарлайды Azattyq Rýhy astana.gov.kz-ке сілтеме жасап.

Жаңа көпірдің эскиздерін қалалық урбанистика орталығы әзірлеген. 

Көпірдің жалпы ұзындығы – 910 метр, ені 36 метр, ал шамдарының биіктігі 5-тен 16 метрге дейін болмақ. Жарықтар масақ түрінде жасалады. Жобаның негізгі идеясы - тың жерлерді игеру тарихи оқиғасымен байланысты. Көпірде орналасқан төрт баған ою-өрнектермен безендіріледі. Сонымен қатар мұнда жаяу жүргінші және велосипед жолақтары да қарастырылған. Ол елорданың оң және сол жағалауын жалғайтын болады.

Бұл құрылыс "Нұр-Сұлтан - жайлы қала" шеберлік–жоспары аясында жүргізілуде. Сонымен қатар, бұқаралық спортты дамыту үшін жаңа көпір астында қоғамдық алаң салу көзделген.
"Тәуелсіздік даңғылынан жалғасатын жаңа көпір елордамыздың тарихи өткенін бейнелейді. Көпір сол және оң жағалауды жалғап, әкімшілік орталықтан жаңа теміржол вокзалына дейін жол жүру уақытын қысқартып, жолаушылар ағынын жеңілдететіні маңызды", - деді Нұр-Сұлтан қаласының урбанистика орталығының басшысы Елнар Базыкен.

Жобаның құрылысы келесі жылға жоспарланған.