Көкшетауда сұйылтылған газ тапшы: мәселе қашан шешіледі?

Көкшетау қаласының газ құятын станциялары мен өнеркәсіпті кәсіпорындарында бірнеше күннен бері газ тапшы. Қаланың бірнеше көпқабатты үйлерінде де газдың жоқтығы туралы әлеуметтік желілерде тұрғындар жазып жатыр. Өңірде газ тапшылығының себебі мен оның қашан шешілетіні жөнінде Ақмола облысының энергетика және тұрғын үй-коммуналдық шаруашылық басқармасының басшысы Иван Юрченко түсініктеме берді.

Газ таратушы ұйымдардың хабарлауынша, 6 қазанға дейін Көкшетауға 839 тонна сұйылтылған мұнай газы жеткізілуі тиіс.

«Ақмола облысының энергетика және тұрғын үй-коммуналдық шаруашылық басқармасымен өкілетті органға қыркүйек және қазан айларына сұйылтылған газ жеткізу туралы уақытында жиынтық өтінімдер жолданған. Ақмола облысының теміржол бойында сұйылтылған газ таситын цистерна-вагондардың ұзақ уақытқа кешігуіне және өндіруші зауыттардың сұйылтылған мұнай газы өндірісін бұрынғыдан гөрі едәуір мөлшерде төмендетуіне байланысты осындай тапшылық болды. Дегенмен, алда (ертең – авт.) өндіруші зауыттардан газ келіп, күрделі мәселе шешімін табуы тиіс.

Жоғарыда аталған себептерге байланысты қалада болған газ тапшылығының туындауына орай орын алған жағдай біздің тарапымыздан толықтай бақылауға алынған. Жақын арада қаладағы тұрғын үйлерге бұрынғысынша газ беріліп, газ құятын станциялар бұрынғысынша қалыпты жұмыс режимінде жұмыстарын жалғастыратын болады. Сондықтан, қала тұрғындарынан сабыр сақтап, сұйылтылған газдың берілуін азғантай уақытқа күтуін сұраймын», - дейді басқарма басшысы Иван Юрченко.

ҚР Энергетика министрлігі өндіруші зауыттарға Ақмола облысына шұғыл түрде сұйылтылған мұнай газын жеткізу туралы тапсырма берілген.

Абзал Алпысбайұлы, Ақмола облысы