Қазақстанда 2020 жылы номиналы 2 мың және 5 мың теңгелік банкноталар қолдан жасалған
Қазақстанда биыл жалпы сомасы 1,2 млн теңгені құрайтын 381 жалған банкнот анықталды, деп хабарлайды Azattyq Rýhy тілшісі Ұлттық банкке сілтеме жасап.
«Қазақстанда 2020 жылғы жеті ай аралығында жалпы сомасы 1,2 млн теңге құрайтын 381 жалған банкнотасы анықталды. Сонымен қатар, аталған кезеңде жалған монеталарды шығару фактілері тіркелмеді» - деп жазылған хабарламада.
Банк өкілі атап өткендей, жалған ақша белгілерінің саны 2019 жылдың ұқсас кезеңімен салыстырғанда 46,9 % - ға төмендеді (өткен жылғы көрсеткіш - 718 банкнот және 6 монета). Жалған банкноттардың басым бөлігі Алматы қаласында анықталды - 243 жалған банкноты (63,78%). Бұл ретте, көбінесе Қазақстанда 2020 жылы номиналы 2 мың (41,47 %) және 5 мың теңгелік (31,5%) банкноталар қолдан жасалған.
Айта кетсек, Қазақстанда жалған банкноттары шығару және сатумен айналысқандар 5 жылдан 12 жылға дейінгі мерзімге сотталады.