Мемлекеттік қызметшілердің шетел банктеріндегі есепшотына шектеу енгізіледі
2021 жылдан бастап қос азаматтығы бар лауазымды тұлғалар қызметінен босатылады
Мемлекет басшысы Қасым-Жомарт Тоқаев Қазақстан халқына жолдауында сыбайлас жемқорлықпен күрестің жаңа тәсілдерін енгізу керек екенін айтты.
«Сыбайлас жемқорлыққа қарсы күрестің жаңа тәсілдерін енгізген жөн деп санаймын. 2021 жылдан бастап мемлекеттік қызметшілердің, депутаттардың, судьялардың шетел банктерінде есепшотқа ие болуы, қолма-қол ақша және бағалы заттар сақтауына қатысты жемқорлықпен күрес аясында жаңа шектеулер енгізу керек. Мемлекеттік қызметші немесе квазимемлекеттік мекеме басшысы қос азаматтық алған жағдайда олар қызметінен босатылады», - деп атап өтті Президент.
Мемлекет басшысы квазимемлекеттік секторда қоғамдық кеңестер құру мүмкіндігін қарастыру, Парламент қарауындағы тиісті заң жобасын жыл аяғына дейін қабылдау керек екенін атап өтті. Президент қоғамдық кеңестердің құрамына түрлі әлеуметтік топ өкілдерін тарту қажет екенін айтты.
Айжан Қалиева, Нұр-Сұлтан
