Шетелдегі қазақстандық студенттерге көмектесу үшін жедел штаб құрылды

Қазақстанның Сыртқы істер министрлігі шетелдегі қазақстандық студенттердің мәселелерімен айналысатын арнайы жедел штаб құрды, деп хабарлайды Azattyq Rýhy тілшісі министрліктің баспасөз қызметіне сілтеме жасап.

«Қазіргі таңда әлемде жалғасып жатқан коронавирус індеті шетелде білім алатын қазақстандық студенттер үшін белгілі бір қиындықтар туғызуда. Көптеген елдерде тұрақты авиациялық және көлік байланысы тоқтатылып, шетелдік азаматтарға кіруге тыйым салынып, карантин режимі сақталуда. Шетелдік оқу орындары шетелдік студенттер үшін қашықтан оқыту форматына көшкен. Осыған байланысты қазақстандық студенттердің жұмыстарын үйлестіру және оларға қажетті көмек көрсету үшін Сыртқы істер министрлігінде Жедел штаб құрылып, оған Орталық аппарат қызметкерлерімен қатар шетелдегі консулдық қызметкерлері де кірді», - деп жазылған хабарламада.

Консулдық қызметкерлер өздері орналасқан елдердегі әр университетпен байланыс орнатып, шетелдік студенттер үшін ұсынылатын оқу форматын анықтауда. Сонымен қатар СІМ штабы Қазақстанда тіркелген шетелдік елшіліктермен тұрақты байланыста.

«Штаб біздің студенттерге университеттермен байланыс орнатуда, виза рәсімдеуде, белгілі бір елге кіру мен шекарадан өту және т.б. мәселелерде көмек көрсетеді», - делінген хабарламада.

Студенттер мен олардың ата-аналарынан барлық сұрақтар бойынша ҚР СІМ Жедел штабына хабарласуға болады. Тел:+7 (7172) 72-00-46, 72-00-47, 72-05-49, электрондық пошта - covid19@mfa.kz.