СҚО-да құтқарушылар адасып кеткен балықшыны құтқарды

Солтүстік Қазақстан облысының Айыртау ауданында ТЖМ құтқарушылары Шалқар көлінде қиын жағдайға тап болған тұрғынға көмекке келді. Ер адам резеңке қайықпен балық аулауға шыққан, алайда кенеттен көтерілген қатты желдің салдарынан жағалаудан алысқа ығысып кеткен, деп хабарлайды Azattyq Rýhy.

Оқиға туралы шұғыл хабарлама түскен бойда ТЖМ жедел-құтқару жасағы су айдынына аттанды. Құтқарушылар көл бетін жедел шарлап, резеңке қайықта жүрген ер адамды тапты. Балықшы су ортасынан қауіпсіз жерге эвакуацияланып, аман-есен жағалауға жеткізілді. Ер адам медициналық көмекке мұқтаж болған жоқ, оның өмірі мен денсаулығына қауіп төніп тұрған жоқ.