Каспийдегі итбалықтардың жаппай қырылуына жер сілкіністері себеп болуы мүмкін
Балық шаруашылығы комитеті жануарлардың өліміне бірнеше фактор әсер етуі ықтимал екенін мәлімдеді
Каспий теңізінің Ақтау маңындағы жағалауынан табылатын итбалықтардың жаппай қырылуына су астындағы жер сілкіністері себеп болуы мүмкін, деп хабарлайды Azattyq Rýhy Lada.kz-ке сілтеме жасап хабарлайды.
Балық шаруашылығы комитетінің төрағасы Серік Сермағамбетовтің айтуынша, мамандар жануарлардың қырылуына әсер етуі мүмкін бірнеше ықтимал себепті қарастырып жатыр. Олардың қатарында су астындағы жер сілкіністері, теңіз түбінен бөлінетін табиғи газдар және асфиксия бар. Сонымен қатар қатты батыс желі өлген итбалықтардың денесін Маңғыстау облысының жағалауына алып келуі мүмкін.
Серік Сермағамбетов Каспий теңізінің барлық акваториясында өлген итбалықтардың жыл сайын анықталатынын айтты. Оның сөзінше, бүгінге дейін жануарлардан жұқпалы ауру белгілері анықталмаған.
Комитет басшысы ең көп итбалықтың қырылуы 2024 жылы тіркелгенін атап өтті. Сол кезде шамамен екі мың итбалықтың өлексесі табылған. Оның айтуынша, жануарлар Қазақстан аумағында ғана емес, Әзербайжан немесе Иран жағалауында да қырылуы мүмкін. Кейін қатты батыс желі олардың денесін Ақтау жағалауына жеткізеді.
Жедел әрекет ету үшін жергілікті атқарушы органдар мен қоғамдық ұйымдардың өзара іс-қимыл алгоритмі бекітілген. Ол өлген жануарларды жинауды және Каспий итбалығының популяциясын сақтауға бағытталған шараларды қамтиды.
Бұдан бөлек, Мемлекет басшысының тапсырмасымен Ақтауда мемлекеттік табиғи резерват құрылған. Өткен жылы мұнда қысқы кеме қатынасына шектеу енгізіліп, балық аулау учаскелерінің шекарасы қайта қаралды. Нәтижесінде олар Каспий итбалығының негізгі көші-қон жолдарынан алыстатылды.
Балық шаруашылығы комитетінің мәліметінше, қабылданған шаралардың нәтижесінде биыл жағалаудан табылған өлген итбалықтар саны 235-ке дейін азайған.
Көп оқылған
