«34 градусқа дейін жылы»: сәуір айының соңғы күндеріне арналған ауа райы болжамы жарияланды

Синоптиктердің мәліметінше, еліміздің басым бөлігінде ауа райы құбылмалы болады. Жаңбыр жауып, найзағай ойнайды. «Қазгидромет» алдағы үш күнге арналған ауа райы болжамын жариялады, деп хабарлайды Azattyq Rýhy.

Оңтүстік-шығыстың таулы аудандарында түнгі уақытта жаңбыр мен дымқыл қар түріндегі жауын-шашын болжанып отыр. Кей жерлерде бұршақ жауып, екпінді жел соғуы мүмкін. Түнгі және таңғы сағаттарда тұман күтіледі.

«Жауын-шашынсыз ашық ауа райы солтүстік және орталық облыстарда бүкіл кезең бойы, оңтүстік облыстарда 28-29 сәуірде, шығыс облыстарда 29-30 сәуірде күтіледі. Республиканың оңтүстік-батысында және оңтүстігінде шаңды дауыл болжанады. Түнгі және таңғы сағаттарда республика бойынша тұман күтіледі. Батыста, солтүстік-батыста, солтүстікте, шығыста, сондай-ақ 28-29 сәуірде елдің орталығында түнгі уақытта 3°С-қа дейін үсік жүреді деп күтіледі», – делінген «Қазгидромет» болжамында.

Күндіз республика бойынша ауа температурасы біртіндеп жылынады:

• батыста +15...+20°С дейін;
• солтүстік-батыста +17...+25°С дейін;
• солтүстікте +21...+26°С дейін;
• орталықта +21...+30°С дейін;
• шығыста +19...+27°С дейін;
• оңтүстікте +25...+34°С дейін;
• оңтүстік-шығыста +22...+27°С дейін.