Ақтөбедегі базарлардың инфрақұрылымы сын көтермейді: әкім тексеріс жүргізді
Қалада 14 әлеуметтік шағын базар жұмыс істейді
Ақтөбе облысының әкімі Асхат Шахаров қаладағы шағын базарлардың жай-күйін тексерді. Өнім бағасы арзан болғанымен, павильондардың инфрақұрылымы сын көтермейді, деп хабарлайды Azattyq Rýhy.
Бүгінде Ақтөбеде 14 «Табыс» әлеуметтік шағын базары жұмыс істейді. Мұндағы тауарлар тікелей аудандардан жеткізілетіндіктен, баға нарықтағыдан 10–15% төмен. Алайда, әкімнің тексерісі базарлардың дамуына кедергі болып тұрған бірнеше олқылықты анықтады:
Тоңазытқыш жабдықтарының жетіспеушілігі. Бұл ет және сүт өнімдерінің ұзақ сақталуын шектейді.
Су құбыры мен кәріз жүйесінің болмауы сауда нүктелерінде санитарлық талаптарды сақтауға кедергі келтіреді.
Шалғай аудандардан (мысалы, Шалқар ауданы) өнім жеткізуде қиындықтар бар.
Инфрақұрылымдық мәселелерге қарамастан, қала тұрғындары мұндай шағын базарлардың маңыздылығын атап өтті. Ақтөбеліктер үшін үй іргесіндегі дүңгіршектен балғын көкөніс пен сүт өнімдерін алу тиімді.
«Үйдің жанында осындай базардың болғаны өте ыңғайлы. Үлкен базарларға барып уақыт шығындамаймыз, бағасы да көңілден шығады», — дейді қала тұрғындары.
Әкім Асхат Шахаров Мәртөк және Шалқар аудандарына бекітілген павильондарды аралап көрді. Мысалы, Бөкенбай батыр көшесіндегі нысанда тоңазытқыш тек «Ауыл аманаты» бағдарламасы бойынша ашылған бөлімде ғана бар. Әкімдік алдағы уақытта барлық павильондарды қажетті жабдықтармен қамтамасыз ету мәселесін қарастырмақ.
Көп оқылған
