«Тәтті олжа»: Италияда 12 тонна шоколад тиелген жүк көлігі ұрланды

Италияда ірі көлемдегі KitKat шоколадтары тиелген көлікті белгісіз біреулер айдап кеткен, деп хабарлайды Azattyq Rýhy. 

Шоколадтың жаңа түрі тиелген жүк көлігі Еуропа аумағы арқылы тасымалданып бара жатқанда қолды болған.

The Guardian басылымының дерегіне сүйенсек, нақты саны — 413 793 тәтті.

KitKat брендіне иелік ететін Nestlé компаниясының өкілі ұрлық фактісін растады. Компания қазір жергілікті билік органдарымен және жеткізу тізбегіндегі серіктестерімен бірге оқиғаны тексеріп жатыр.

Nestlé мәліметінше, жүк көлігі Италияның орталық бөлігіндегі зауыттан шығып, Польшаға бағыт алған. Сол жолда ол ұрланған. Қазіргі уақытта жүк көлігі де, шоколад та табылған жоқ. Оқиға салдарынан ешкім зардап шекпеген.

«Біз әрдайым адамдарды KitKat-пен үзіліс жасауға шақырып келдік. Бірақ бұл жолы біреулер оны тым тура түсінген сияқты: 12 тоннадан астам шоколадты алып кеткен», – делінген компания мәлімдемесінде.

Nestlé өкілдері соңғы уақытта жүк көліктерін ұрлау бизнес үшін күрделі мәселеге айналып бара жатқанын атап өтті. Қылмыскерлер барған сайын күрделі тәсілдерді қолдана бастаған. Компания осы жағдайды әдейі жария етіп, мәселенің өзектілігіне назар аудартуды көздеп отыр.

Ұрланған өнім — Formula 1 тақырыбына арналған жаңа сериядағы KitKat шоколадтары. Олар жарыс көліктерінің пішінінде жасалған, бірақ ішкі құрылымы дәстүрлі вафли негізінде сақталған.

Компания сондай-ақ бұл өнімдер бейресми нарықта пайда болуы мүмкін екенін ескертті. Дегенмен әр шоколадқа берілген партия кодтары арқылы оларды анықтауға болады деп отыр.