Мюнхен әуежайында 500 жолаушы түнді ұшақта өткізді

Германияның оңтүстігінде болған күшті жел мен толассыз қар салдарынан 500-ге жуық жолаушы Мюнхен әуежайында түні бойы ұшақ ішінде қалды, деп хабарлайды Azattyq Rýhy.

Қолайсыз ауа райы елдегі көлемі жөнінен екінші орында тұрған әуежайдың жұмысын күрт тежеді. 100-ге жуық рейс тоқтатылып, өзге бағыттардың ұшу уақыты белгісіз күйде қалды.

Қарбаласты азайту үшін Бавария әуе қозғалысын басқару қызметіне бір реттік жеңілдік беріліп, түнгі рейстерді 01:00-ге дейін орындауға рұқсат етілді. Әдетте Мюнхен әуежайында 00:00 мен 05:00 аралығында ұшуға қатаң шектеу қойылған.

Кешкі уақытта бірнеше алыс және жақын бағыттағы рейске жолаушылар отырғызылып, ұшақтар мұздан тазартылып, ұшуға дайындалды. Алайда түн ортасына қарай қардың екпіні күшейіп, ұшу жолағын дер кезінде тазалау мүмкін болмады. Нәтижесінде кезекте тұрған борттарға ұшуға рұқсат берілмеді.

Кейін мәселенің тек ауа райымен шектелмейтіні белгілі болды. Ұшақтар жолаушыларды терминалға қайта түсіре алмады, себебі тұрақ орындарының барлығы бос емес еді. Әуежай әкімшілігінің мәліметінше, сол сәтте шамамен 500 адамды тасымалдауға жеткілікті автобус болмаған. Бұл туралы Aviation.Direct басылымы жазды.

Жалпы 5 рейс тығырыққа тірелді. Оның төртеуі Lufthansa әуе компаниясына, біреуі оның еншілес құрылымы Air Dolomiti компаниясына тиесілі.

Эвакуация тек таңғы 05:00-ден кейін басталды. Осы уақыттан соң рейстер біртіндеп қалпына келтіріліп, қосымша автобустар ұйымдастырылған.

Lufthansa компаниясы жағдайдың ушығуын жердегі қызметтердің жұмысына байланысты деп бағалайды. Ал Munich Airport әкімшілігі кінәні тосын әрі қатал қыс жағдайымен түсіндіріп, қолда бар ресурстың толық пайдаланылғанын мәлімдеген.

Оқиғадан кейін әлеуметтік желілерде түні бойы ұшақта отырған жолаушылардың суреттері тарады. Байланыс тапшылығы мен ақпараттың дер кезінде берілмеуі сынға ұшырады. Түнгі рейстерге рұқсат берілгенімен, олардың орындалмауы және жолаушыларды терминалға дер кезінде түсіру мүмкін болмауы түсініспеушілік туғызды.

Сарапшылар төтенше жағдайлар жоспарының әлсіздігін атап өтеді. Боран кезінде рейстердің кешігуі авиация саласында қалыпты жағдай саналғанымен, жолаушылардың 6 сағаттан астам уақыт бортта қалуы қызмет көрсету стандарттарына сай келмейді деген пікір айтылуда.

Қазір оқиғаға байланысты тексеріс жүргізіледі. Жолаушыларға басымдық неге берілмеді, қысқы жағдайға дайындық жеткілікті болды ма деген сұрақтар ашық күйінде қалып отыр.