Қостанайда жаңа Конституция жобасы кәсіпкер әйелдермен талқыланды

Қостанай облысында «Әділетті және Прогрессивті Қазақстанның Халықтық Конституциясы үшін!» жалпыұлттық коалициясы мүшелерінің қатысуымен әйел-кәсіпкерлердің өңірлік форумы және тұрғындармен бірқатар кездесу өтті, деп хабарлайды Azattyq Rýhy.

Іс-шаралар жаңа Конституция жобасының негізгі нормаларын түсіндіруге және оның мемлекеттілікті нығайту, заң үстемдігін күшейту, азаматтардың құқықтары мен мүмкіндіктерін кеңейту бағытындағы стратегиялық рөлін талқылауға арналды.

Өңірлік форумға 200-ге жуық кәсіпкер әйел, қоғамдық ұйымдар мен азаматтық қоғам өкілдері қатысты. Талқылау барысында конституциялық реформалар кәсіпкерлікті дамытуға құқықтық кепілдіктерді күшейтіп, азаматтардың қоғамдық-саяси үдерістерге қатысу аясын кеңейтетіні атап өтілді.

ҚР Парламенті Мәжілісінің депутаты, жалпыұлттық коалиция мүшесі Екатерина Смышляеваның мәліметінше, жаңа Конституция елдің құқықтық жүйесін жаңғыртып, әлеуметтік әділеттілік қағидаттарын нығайтуға бағытталған. Оның айтуынша, құжат әр азаматтың өз әлеуетін іске асыруына және ел дамуына үлес қосуына жағдай жасауды көздейді.

Қазақстанның Азаматтық Альянсының президенті Бану Нұрғазиеваның мәліметінше, конституциялық өзгерістер мемлекет пен қоғам арасындағы сенімді арттырып, азаматтық институттардың маңызды шешімдер қабылдау процесіне қатысуын кеңейтеді.

«AMANAT» партиясы Қостанай облыстық филиалының төрағасы, өңірлік коалиция жетекшісі Алмат Досмұхамедовтің мәліметінше, жаңа Конституцияда әлеуметтік әділеттілік, еңбек адамының құқықтарын қорғау және халықтың әл-ауқатын арттыру қағидаттары айқын көрініс тапқан.

Коалиция мүшелері Тобыл қаласындағы «Алтын дән» мәдениет үйінде тұрғындармен кездесіп, конституциялық реформалардың азаматтардың құқықтары мен бостандықтарын қамтамасыз етудегі маңызын түсіндірді.

Бұдан бөлек, ССГПО еңбек ұжымымен кездесу өтті. Кездесуде қызметкерлердің әлеуметтік қорғалуы, қауіпсіз еңбек жағдайларын қамтамасыз ету және еңбек адамының мәртебесін арттыру мәселелері талқыланды. Кәсіпорын өкілдерінің мәліметінше, жаңа Конституция нормалары еңбек кепілдіктерін күшейтуге және әлеуметтік тұрақтылықты нығайтуға бағытталған.

Сондай-ақ коалиция мүшелері «НПО Медидез» ЖШС ұжымымен жүздесіп, реформалардың экономикалық өсімге серпін беріп, заң үстемдігін күшейту және азаматтардың өмір сапасын арттыруды көздейтінін жеткізді.

Кездесулер қорытындысында қатысушылар жаңа Конституция жобасы ел дамуының стратегиялық басымдықтарына сай келетініне назар аударды. Алдағы референдум қоғамның әділеттілікке, тұрақтылыққа және орнықты болашаққа ұмтылысын айқындайтын маңызды кезең ретінде бағаланды.